Engeler Verlag

Dialäkt: Baseldütsch

Dr Engeler Verlag isch e literaarische Buechverlag mit Sitz z Schupfart im Aargau. Früener hed er Sitz z Holderbank SO und z Soledurn ka.

Vo 1997 bis 2009 heds e Vorgängerverlag mit em Naame Urs Engeler Editor gää, wo z Basel und z Wiil am Rhii gsi isch. Dr Verleger Urs Engeler hed au en Label, wo Roughbooks haisst.

Gschicht und Konzeption

Dr Schwerpunkt vom Verlagsprogramm lit im Beriich vo dr Lyrik, dr Poesii/Poetik und uf litraturtheoretisch-filosofische Abhandlige. Dr Gründer Urs Engeler het Vergliichendi Litraturwüsseschaft bim Hans-Jost Frey an dr Universidät Züri studiert. Drbii isch d Idee entstande, e Zitschrift für Poesii und ihri Poetik uusezgee: Sit 1992 git dr Urs Engeler d Lyrik-Zitschrift Zwischen den Zeilen uuse. Die het d Grundlag für d Gründig vom Verlag Urs Engeler Editor bildet. Sit 1995 hat dä mit dr Understützig vo Mezene meh as 60 Autore us Dütschland, Östriich, dr Schwiz, Frankriich, de USA und Italie uusebrocht, bis dr Mezen sich 2009 zruggzoge het. Dr Engeler het dr Verlag zuedoo, macht aber mit däm siiner Backlist und äinzelne Brojekt witer.^[1]

2010 het dr Engeler mit em Herstelligs- und Verdriibskonzept roughbooks aagfange, wo hütige Määrtgsetz genauso grächt sött wärde wie aaspruchsvolle Inhalt. D Ditel, wo kommerziell erfolgriicher si, wärde em Handel über dr nöi gründeti Engeler Verlag aabote, die andere Lyrik-Bänd bietet Roughbooks via Internet im Diräktverdriib aa: Chliiuflage im Digitaldruck, ohni ISBN, zum Däil under starker Mithilf vo de Autore.^[2]

Autore

Kurt Aebli, Urs Allemann, Arno Camenisch, Michael Donhauser, Elke Erb, Brigitta Falkner, Jayne-Ann Igel, Birgit Kempker, Robert Kelly, Jürg Laederach, Bert Papenfuß, Oskar Pastior, Wolfgang Schlenker, Michael Stauffer, Ulf Stolterfoht und Peter Waterhouse.

Autore vom Label Roughbooks si bis jetzt: Hannah Arendt, Tim Turnbull, Michael Stauffer, Ulf Stolterfoht, Werner Hamacher, Christian Filips und Elke Erb

Übersetzige

Näbe de dütschsproochige Originalusgoobe erschiine Übersetzige vom Walter Abish, Anna Achmatowa, Donald Barthelme, James M. Barrie, Maurice Blanchot, E. E. Cummings, Emily Dickinson, Hilda Doolittle, Jorie Graham, Wladimir Majakowski, Harry Mathews, Marianne Moore, Gellu Naum, Arthur Rimbaud, Ahmad Schamlu, Gertrude Stein, James Thomson, Rosmarie Waltrop und Andrea Zanzotto.

Räihje

Sammlig Urs Engeler Editor
Theorii: z. B. im Felix Christen si Eine andere Sprache, e Wärk zum Friedrich Hölderlin siiner groosse Pindar-Überdraagig
Wärkusgoobe: z. B. Michael Donhauser

Uszäichnige

2008: Dr Bade-Württebärgisch Landesbriis für literarisch ambitionierti chliineri Verläg^[3]
2007: Dr Förderbriis vo dr Kurt Wolff Stifdig
2003: Dr Dütschi Hörbuechbriis für Fümms bö wö tää zää Uu. Stimmen und Klänge der Lautpoesie. Hrsg. Christian Scholz und Urs Engeler
2002: Dr Karl-Zillmer-Briis vo dr Hamburgische Kulturstifdig an Urs Engeler für verdienstvolls verlegerischs Handle
1999: dr Kulturbriis vo dr Stadt Basel

Litratur

Theo Breuer: Urs Engeler Editor. In: Ders., Aus dem Hinterland. Lyrik nach 2000. Edition YE 2005, S. 150–151.

Weblingg

Fuessnoote

Dä Artikel basiert uff ere fräie Übersetzig vum Artikel „Urs_Engeler_Editor“ vu de dütsche Wikipedia. E Liste vu de Autore un Versione isch do z finde.

[1] Nils Kahlefendt: Urs Engeler über die literarische Produktivität in Zeiten der Wirtschaftskrise. In: Börsenblatt des Deutschen Buchhandels vom 29. Mai 2009, abgrüeft am 5. Juli 2010

[2] Nils Kahlefendt: „Die herkömmlichen Wege funktionieren nicht mehr“. In: Börsenblatt des Deutschen Buchhandels vom 17. Juni 2010, abgrüeft am 5. Juli 2010

[3] Stadt Karlsruhe: Preisverleihung an Engeler-Verlag am 5. Februar 2008, abgrüeft am 5. Juli 2010

[1]

[2]

[3]