Johann Ulrich Büchel

S Huus zum Kirschgarte, Basel

Dialäkt: Baseldütsch

S Roothuus z Winterduur

D Pfarrchille Gräntzinge

Dr Johann Ulrich Büchel (* 27. Dezämber 1753 z Basel; † 23. Dezämber 1792 z Basel) isch e Schwizer Baumäister, Zäichner und Radierer im Spootbarock und früeje Klassizismus gsi. Näben em Johann Jacob Fechter (1717–1797) und Samuel Werenfels (1720–1800) gältet er as äine vo de bedütendste Baumäister vo dr Stadt Basel im 18. Joorhundert.

Lääbe

Dr Ulrich Büchel isch dr Soon vom Stäimetz Daniel Büchel und e Groossnöwöö vom Basler Beck, Groossroot, Mooler und Zäichner Emanuel Büchel gsi. Er het z Basel e Leer zum Stäimetz gmacht, woorschinlig im Bedriib vo sim Vater und het 1775 au d Mäisterbrüefig bestande. Zwäi Joore spööter het er d Anna Maria Fatio ghürootet. 1789 isch er Säggser vo dr Spinnwätterzumft, also Mitgliid vom erwiiterete Vorstand und eso au Groossroot worde, und spööter Oberstwachmäister.

Mä vermuetet, ass dr Archidekt Achilles Huber (1776–1860) si erste Underricht bim Büchel überchoo het.

Wärk

• 1775: D Iigangshalle vom Huus zum Goldige Löi, Basel (nit erhalte)
• 1775–80: s Huus zum Kirschgarte, Basel; won er für dr Basler Siidebandfabrikant Johann Rudolf Burckhardt baut het
• 1787: dr Gartebavilliong vom Landguet Bellevue vor em Basler Santihansdoor
• 1781–84: s Roothuus vo Winterthur
• 1782: D Pfarrchille vo Gräntzinge im Elsass

Dr Büchel het au e Hufe Akwarell, Guasch, Fääderzäichnige, Radierigeen und Akwatintadruck gmacht. Er het Archidektuure und Landschafte daargstellt und Entwürf vo Büünebilder gmacht.

Litratuur

• Marie-Claire Berkemeier-Favre: Johann Ulrich Büchel (1753–1792), Architekt des Hauses zum Kirschgarten: Leben und Werk. In: Burkard von Roda et al. (Hrsg): Das Haus zum Kirschgarten und die Anfänge des Klassizismus in Basel (Kat. z. Ausst. Sehnsucht Antike im Historischen Museum Basel, Haus zum Kirschgarten, 17.11.1995–28.4.1996), Basel: Historisches Museum 1995, S. 51–70.

Weblingg

• Marie-Claire Berkemeier-Favre: Büchel, Johann Ulrich. In: Historisches Lexikon vo dr Schwiiz.

Dä Artikel basiert uff ere fräie Übersetzig vum Artikel „Ulrich_Büchel“ vu de dütsche Wikipedia. E Liste vu de Autore un Versione isch do z finde.