Uli Sckerl

Us der alemannische Wikipedia, der freie Dialäkt-Enzyklopedy
Dialäkt: Undermarkgreflerisch

Dr Hans-Ulrich „Uli“ Sckerl (* 28. April 1951 in Weinheim; † 14. Februar 2022 au dert[1]) isch e dytsche Bolitiker (Bindnis 90/Di Griene) gsii.

Uusbildig un Beruef[ändere | Quälltäxt bearbeite]

Nech em Abitur z Weinheim het dr Sckerl Jura un Volkswirtschaftslehr z Heidelberg un z Frankfurt studiert. Ab 1980 het er as Beroter un Gschäftsfierer gschafft.

Bolitischi Laufbahn[ändere | Quälltäxt bearbeite]

Dr Uli Sckerl isch syt 1980 Mitglid vu dr Griene gsii. Ab 1998 isch er Vorsitzer vum griene Chraisverband Neckar-Bergstroß gsii, die Funktion het er au scho vu 1980 bis 1990 ghaa. Ab 1984 isch er Mitglid im Chraisdag vum Rhy-Necker-Chrais gsii un dert vu 1984 bis 2011 Vorsitzer vu dr Chraisdagsfraktion vu dr Griene gsii. Vu 1989 bis 1998 isch er Gmairot fir d GLH z Hirschberg gsii, ab 2004 isch er Stadtrot fir di Grien Alternativ Lischt z Weinheim gsii. Vu 1999 bis 2014 isch er Midgliid vu dr Verbandsversammlig vum Verband Region Rhein-Neckar gsii. In däre Funktion isch er ab 2001 au Mitglid im Landesvorstand vu dr Griene z Bade-Wirttebärg gsii. Anne 2006 isch dr Sckerl in dr Landdag vu Bade-Wirttebärg gwehlt wore. Im Landdag isch er Mitgliid im Präsidium, im Ständigen Uusschuss, im Innenuusschuss, im Untersuechigsuusschuss „EnBW-Deal“, im Uusschuss no Artikel 62 vu dr Verfassig (Notbarlemänt), im Untersuechigsuusschuss „Polizeieinsatz Schlossgarten II“ un im Barlemäntarische Kontrollgremium gsii. Derzu isch er stellverdrättend Mitglid im Uusschuss fir Finanzen un Wirtschaft, im Uusschuss fir Integration, im Uusschuss fir Europa un Internationali Aaglägehaite, im Petitionsuusschuss, im Wahlbriefigsuusschuss un in dr Enquetekommission „Rechtsextremismus“ gsii. In dr Griene-Fraktion isch er innebolitische un kommunalbolitische Sprächer gsii. Syt dr Konschtituierig vu dr neie Landesregierig unter dr Fierig vum Winfried Kretschmann am 12. Mai 2011 isch dr Sckerl barlemäntarische Gschäftsfierer un stellverdrättende Fraktionsvorsitzer vu dr Grienen im Landdag gsii. Anne 2009 het er dr Ehrering vum Rhy-Necker-Chrais iberchuu.

Vu 1999 bis 2010 isch dr Sckerl ehreamtlige Vorsitzer vu dr grien-noche kommunalbolitische Verainigung „Grüne und Alternative in den Räten Baden-Württemberg (GAR)“ gsii, wu uf Landesebeni d Inträsse vu dr rund 1250 grienen un grien-noche kommunale Mandatsdregerne z Bade-Wirttebärg verdritt.

Privats[ändere | Quälltäxt bearbeite]

Dr Sckerl isch ghyrote gsii un het zwai Chinder ghaa. Är het mit syre Familie z Weinheim gläbt.

Sunschtigs Engaschmänt[ändere | Quälltäxt bearbeite]

  • Mitglid im Byrot vum Pilgerhaus Weinheim
  • Mitglid im Ufsichtsrot vu dr Stadtwerke Weinheim GmbH.
  • Stellverdrättend Mitglid im Ufsichtsrot vu dr Abfallverwertungsgesellschaft des Rhein-Neckarkreises mbH,
  • Stellverdrättend Mitglid im Ufsichtsrot vu dr Gesundheitszentren Rhein-Neckar gGmbH (GRN)
  • Stellverdrättend Mitglid im Ufsichtsrot vu dr Jugedyyrichtig Stift Sunnisheim gGmbH

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. „Eine Instanz über Parteigrenzen hinweg“ uf weinheim.de