The Swiss Bakery
The Swiss Bakery isch en amerikanische Beckeryybetrieb mit Gschäft z Springfield und Burke im Bundesstaat Virginia. Er isch für Schwiizer und dütschi Produkt bekannt.
De Beck gits syt 2001. Er verchauft Rivella, Julius Meinl und Dallmayr-Kafi, Wasabröd-Cracker, Wy us de Schwiiz, Öschtrych und Italie[1][2][3] und Fleischware wie Landjäger, Bratwurscht und Wysswurscht.
Täglich wärdid Brot, Gebäck, Turte, Chüeche und Guetzli wie zum Byschpil d Basler Läckerli im Lade z Springfield bache, au Glace und Sorbets wärdid dete gmacht. Brotsorte wie Basler Brot, Wurzelbrot, Burebrot, Zopf und Laugebrötli gfindt mer usserhalb vo de Schwiiz susch fascht niene.[4] Drum wärdid die Ware und anderi Produkt vo The Swiss Bakery a anderi Betrieb wytergliferet und wärdid i de Schwiizer Botschaft z Washington, D.C. a de Bundesfyr oder im Swiss Club of Washington uftischet.[5]
Im Lade z Springfield gits au es Café, wo Zmorge- und Zmittagässe mit Brot, Würscht und importiertem Chääs, zum Byschpil Raclette, aabüütet.
S Gschäft ghört em Reto Weber und synere Frau Laurie Alleman Weber. Er isch e Meischterbeck us em Kanton Thurgau und het i de USA zerscht aagfange, Schwiizer Produkt für en Importeur vorzfüehre. Syni Frau het als Konditormeischteri z New York und Washington, D.C. gschaffet.[6]
Einzelnachwys[ändere | Quälltäxt bearbeite]
- ↑ Wine & beer at the Swiss Bakery. theswissbakery.com.
- ↑ Schweizer Revue: The Swiss Bakery. Archiviert vom Original am 27. September 2011.
- ↑ Springfield Connection: The Swiss Bakery. October 2, 2010. Archiviert vom Original am Oktober 3, 2011.
- ↑ Breads at the Swiss Bakery. theswissbakery.com.
- ↑ Swiss Club of Washington, D.C.. swissclubdc.org.
- ↑ About us. theswissbakery.com.