Susanne Eberle-Strub

D Susanne Eberle-Strub (* 10. Juni 1960 z Grabs as Susanne Strub) isch e liachtaschtaanischi Bolitikeri (FBP). Syter anne 2017 isch si Abgoordneti im liachtaschtaanische Landdaag.

Lääbe

D Eberle-Strub isch e Doochter vum Hans Strub, eme Boschtmaischter, un syre Frau Frieda geb. Schädler. Si isch mit zwoo Schweschtere z Vaduz ufgwachse. Si stammt us ere Familie, wu dr Fuurtschrittlige Buurgerbartei noostoot un scho ne Raie vu Bolitiker fiiribroocht het, wie zem Byschpel dr Brueder vu irem Grooßvater uf dr Vatersyte, dr David Strub, ire Grooßvater vu dr Muetersyte här, dr Eugen Schädler, un d Emma Eigenmann, e Schweschter zue ire Mueter.

Vu 1967 bis 1972 isch si z Vaduz uf d Primaarschuel gange un derno vu 1972 bis 1977 uf s Inschtitut St. Elisabeth z Schaa, wu si dr Handelsabschluss gmacht het. Vu 1977 bis 1979 isch si uf d Arztghilfineschuel z St. Galle gange un het deert as Diplomierti Arztghilfi DVSA abgschlosse. Ab 1979 bis 1987 het si Tresa un z Schaa as Arztghilfi gschafft. Vu 1988 bis 1996 isch si Mitinhaaberi un Gschäftsfiereri vun ere Videothek z Mels (SG) gsii, ab 1996 derno Huusfrau un Mueter.

Anne 2003 isch si zum eerschte Mool fir d FBP in Gmairoot vu Vaduz gweelt woore. Bi dr Gmairootswaale 2007 un 2011 isch si widergweelt woore, 2015 het si uf e nomooligi Kandidatuur fir e Sitz im Gmairoot verziichtet. In däre Zyt as Gmaireeti isch si vu 2007 bis 2015 Gmainsschuelrootsbresidänti gsii un vu 2011 bis 2015 Vizebuurgermaischteri. Vu 2011 bis 2015 isch si derzue Verdrätteri vu dr liachtaschtaanische Gmaine im Kongräss vu dr Gmaine un Regionne vu Europa bim Europaroot z Strooßburi gsii. Vu 2014 bis 2017 sch d Eberle-Strub Stiftigsreeti vu dr Liachtastaanische Landesbibliothek gsii.

Bi dr Landdaagswaal 2017 isch si fir di Fuurtschrittli Buurgerbartei in Landdaag vu Liachtaschtaa gweelt woore. Si isch Laiteri u dr liachtaschtaanische Delegation bi dr Barlemäntarische Versammlig vum Europaroot z Strooßburi.

D Eberle-Strub isch syter anne 1986 ghyroote mit em Leo Eberle, eme Spoortleerer, un het zwee Siin.

Im Joor 1989 het si mit dr liachtaschtaanische Volleyballnazionaalmannschaft bi dr Spiil vu dr chlaine Staate vu Europa z Nikosia, Zypere mitgmacht.

Weblink

• Redaktion HLFL: Eberle-Strub, Susanne. In: Historischs Lexikon vom Förschtatum Liachtastaa.
• d Susanne Eberle-Strub bim liachtaschtaanische Landdaag
• d Susanne Eberle-Strub uf www.landtagswahlen.li
• d Susanne Eberle-Strub uf dr Internetsyte vu dr FBP