Dr Stachelschützbrunne

Us der alemannische Wikipedia, der freie Dialäkt-Enzyklopedy


Dr Stachelschützebrunne
Dialäkt: Aagglobaaseldütsch

Dr Stachelschützbrunne isch en öffentlige Brunne am Spaalegraabe grad näben em Kollegiehuus am Peetersblatz z Baasel. Er isch 1847 in Betriib gnoo worde und 1865 isch d Figuur vom Stachelschütz, wo dr Heinrich Rudolf Meili us Binnige gmacht het, oobe uf e Stock gsetzt worde. Dä erinneret an die historischi Gsellschaft vo de Armbrustschütze, wo s Lokaal von ene im Stachelschützehuus gsi isch. Säll isch grad wisawii uf dr andere Stroossesite vom Brunne gstande. S Geböid ghöört hüte zur Uni. Dr Brunne stoot nid under Dänggmolschutz. Er isch e beliebte Baadbrunne.

Gschicht[ändere | Quälltäxt bearbeite]

Um 1500 isch an däm Ort e runde Brunne gsi, wo as "brunn uff dem platz under der eich[1]" im Brunnemäister Hans Zschan sim Blaan vom Spaalebrunnwärk iizäichnet isch. [2]

1676 het dr Christoph Abraham Keller us Räägesburg e nöije Brunne baut, mit ere Figur vom Chriegsgott Mars oobe druf [2]. 1847 het mä dä Brunne müesse uswäggsle.

Dr nöi isch isch immer no in Betriib. Er isch us Chalchstäi und het acht Egge und e chliins Suudeldröögli. Es isch äine vo de grösste Brünne in dr ganze Stadt. Die nöi Brunnefiguur us em Joor 1865 isch e Stachelschütz mit eme Beret uf em Chopf und ere Armbrust uf dr lingge Aggsle. E Hufe Lüt mäine, es sig e Statue vom Wilhelm Tell und doorum säge si em vilmol Tellbrunne. [3]

Fuessnoote[ändere | Quälltäxt bearbeite]

  1. Die Äiche het mä 1632 umghackt, zum d Stadtmuure wägen em Drissigjöörige Chrieg z versterke (M. und H.P. Rieder, Rudolf Suter, Basilea botanica, Springer-Verlag, 2013, S.66)
  2. 2,0 2,1 Eugen A. Meier, Basel in der guten alten Zeit: Von den Anfängen der Photographie (um 1856) bis zum Ersten Weltkrieg, Springer-Verlag, 2013, S.114
  3. Stachelschützen-Brunnen uf brunnenfuehrer.ch