Siricius

Us der alemannische Wikipedia, der freie Dialäkt-Enzyklopedy

Dr Siricius (* um 334 z Rom; † 26. Novämber 399) isch vum Dezämber 384, villicht ab em 17. Dezämber, bis zue sym Dod Papscht z Rom gsii. Dr Siricius isch dr erscht Bischof vu Rom gsii, wu dr Titel „Papscht“ fir si sälber bruucht het. Är wird as Hailige verehrt.

Lääbe un Wirke[ändere | Quälltäxt bearbeite]

Sy Name maint stammt us dr Stadt Siris (griech.-latyn.). Är isch Remer gsii un scho syt em Liberius im Dienscht vu dr Chilche. Vor syre Wahl isch er ain vu dr remische Diakon gsii. Sy Gegekandidat isch dr Presbyter Hieronymus gsii, wu ne as bleed dargstellt het. Är isch aistimmig gwehlt un mit Blick uf dr Gegepapscht Ursinus am 25. Februar 385 vum Chaiser Valentinian II. bstetigt wore.

Zinnmedaille vum Siricius

Dr Siricius het erfolgrych Wärt glait uf d Vorrangstellig vum Patriarch vu Rom vor dr ibrige Patriarche. Derwylscht syni Vorgänger ihri Schrybe zmaischt im Stil vu väterlige Mahnige verfasst ghaa hän, het dr Siricius im amtlige Kanzleistil im Befählston un ohni juristischi Begrindig gschribe. Im Sälbschtbewusstsyy, ass er d Sorg fir alli Chilche iberdrait kriegt het, het er as Erschte päpschtligi Dekret zue Liturgy un Disziplin uusegee, wun er im Rang vu synodale Bschliss gsääne het.

In sym Schrybe an dr Himerius vu Tarragona het er Antwort gee uf vierzee no an dr Damasus grichteti Froge, dodrunter e Handligsaawysig, wun er d Widerdaifi vu dr gchehrte Arianer verbote het, d Ufnahm in di Kadolisch Chilche isch dur Handuflege gschääne. D Vorschrift zum Zölibat isch yygschränkt un s Alter fir d Weih feschtlait wore. D Daiftermin sin uf d Oschtere un d Bfingschte bschränkt wore un d Bueßdisziplin abgmilderet.

Uf dr remische Synode 382 isch unter anderem feschtglait wore, ass Bischef chimftig nume no vu mehrere Bischef un mit Zuestimmig vu Rom gweit wäre derfe. D Bschliss sin au an d Chilche z Africa un vermuetli au an anderi Chilche gschickt wore. Dr Siricius het wie dr Ambrosius vu Mailand scharf d Hiirichtig vum Theolog Priscillian missbilligt, wu as Chetzer zum Dod verurdailt wore isch. Dr Bonosus un dr Jovinianus sin verurdail wore.

Anne 395 het dr Siricius dr Neiböu vu Sankt Paul vor dr Muure gweit.

Sy Mahndag isch dr 26. Novämber.

Literatur[ändere | Quälltäxt bearbeite]

  • Ferdinand R. Gahbauer: Siricius. In: Biographisch-Bibliographisches Kirchenlexikon (BBKL). Band 10, Herzberg 1995, ISBN 3-88309-062-X, Sp. 530–531.
  • Johann Peter Kirsch: Pope St. Siricius. In: Catholic Encyclopedia, Robert Appleton Company, New York 1913 (änglisch), Band 14

Weblink[ändere | Quälltäxt bearbeite]

 Commons: Siricius – Sammlig vo Multimediadateie
VorgängerAmtNachfolger
Damasus I.Papscht
384–399
Anastasius I.
Dä Artikel basiert uff ere fräie Übersetzig vu dere Version vum Artikel „Siricius“ vu de dütsche Wikipedia. E Liste vu de Autore un Versione isch do z finde.