Selvarajan Yesudian

De Selvarajan Yesudian (au Selwaradschan und Selva Raja Yesudian; * 25. Februar 1916 z Sholinghur, Tamil Nadu, Indie, † 26. Oktober 1998 z Zöri) isch e südindische Yogalehrer gsii. Er het as ann vo de erste z Europa Yoga underrichtet und zäme mit de Elisabeth Haich meriri Yogaschuele i de Schwiz ggründet.

Lebe

Tamil Nadu

De Selvarajan Yesudian isch am 25. Februar 1916 i de Stadt Sholingur nördlich vo Madras im indische Bundesland Tamil Nadu uf d Welt choo. Sini Eltere sind Ärzt z Madras gsii. Er isch immer e schwächliche Bueb gsii und het ai Chinderchranket um die ander öbercho. Nochere Lungenentzündig mit vierzeni isch er ase schwach gsii, as er nüme mit andere Chind het chöne spile. Er het denn i de Bibliothek vo sim Vatter Büecher öber de Yoga gfunde und mit groossem Intressi glese. Er het denn afange haimlich Hatha Yoga praktiziere, aber sini Gsundhait het drunter no me glitte. Mit föfzeni het er ufeme Spaziergang imene Mangohain e Yogaklass atroffe. Er het de Leerer aagsproche und isch as Schüeler uufgnoo wore. Under de Aalaitig vom Yogalehrer het er schnell en athletische Körper entwicklet und isch gsund wore.

Ungarn

Churz nochem Tod vo sim Vatter ane 1936 het de Selvarajan Yesudian Indie verloo und isch uf Ungarn um z Budapest Medizin z studiere. Er het denn a de Universität Vorträg öber indischi Medizin und Yoga ghalte. Drufabe het er d Bildhaueri Elisabeth Haich gcheneglernt, wo sich besser i indische Schrifte uusgchennt het als er selber. I erem Künstleratelier het er denn 1939 e Yogaschuel uuftue und 1941 s Buech “Sport és jóga useggee.

Schwiz

Nochdem ane 1948 s kommunistische Regime d Yogaschuel z Budapest gschlosse het, hend de Selvarajan Yesudian und d Elisabet Haich im November 1948 Ungarn verloo und sind uf Zöri choo, mit em Ziil uf Kalifornie z goo. Baid sind denn aber i de Schwiz blibe und hend i merere Schwizer Städt Yogaschuelene gründet. Ab 1990 het sich de Selvarajan Yesudian afange zruggzüche und het sini Yoga-Schuel z Sanggale sim langjöörige Schüeler Rolf Heim öberloo. Am 26. Oktober 1998 isch er z Zöri gstorbe.

Werch

De Selvarajan Yesudian hett sich starch mitem Yoga usenandergsetzt. Er het zäme mit de Elisabeth Haich erfolgriich meriri Yogaschuele gründet, so z Budapest (vo 1939-1948) und i de Schwiiz ab 1948 z Aarau, z Basel, z Bern, z Gempf, z Luzern, z Ponte Tresa, z Sanggale und z Zöri. Im ligurische Diano Marina isch zudem no e Yoga-Summerschuel ggründet wore. Er het nöd nume Yoga underrichtet sondern au Vortträäg ghalte und Birootige abotte. Er isch de Autor vo merere Büecher öber de Yoga und d Philosophii wo dehinder steckt. Sini Büecher werdet bis hüt immer wider noi usegee. Em Selvarajan Yesudian sini spirituelli Vorbilder sind de Ramana Maharshi (1879-1950) und de Vivekananda (1863-1902) gsii.

Em Yesudian sin Yoga

De Yesudian het sini Stunde guet strukturiert. Nochere chorze Meditation in ere Sitzhaltig isch e chliine Vortrag öber d Philosophii ghalte wore. Drufabe sind Schnuufüebige (Pranayama) cho und denn sind verschidnigi Yogastelige (Asana) döregfüert wore. Nochere chorze Erholig isch e zwaiti Meditation choo und am Schluss no e Tüüfeentspannig. D Üebige sind i de Regle mit gschlossne Auge möglichst entspannt döregfüert wore um d Konzentratio zerhöche und s Biwusstsii z schärfe und de Prana (Schnuuf, Lebesenergii) z verbessere. Autosuggestion und Bichräftigungsformle sind bruucht wore um d Schüeler im Fortschritt z stärche und um positivs Denke z schuele. Noch de Stund sind a de Schüeler no Üebige för dihai mitgee wore.

Büecher vom Selvarajan Yesudian

Die maiste Büecher het de Selvarajan Yesudian zäme mit de Elisabeth Haich as Mitautorin usegee.

Selvarajan Yesudian: Sport és jóga; Budapest (uf Ungarisch)
Selvarajan Yesudian: Sport + Yoga; Thielle 1949
Selvarajan Yesudian: Yoga in den zwei Welten; Thielle 1951
Selvarajan Yesudian: Yoga im heutigen Lebenskampf; Thielle 1954
Selvarajan Yesudian: Der Tag mit Yoga; Stuttgart; 1959
Selvarajan Yesudian: Selbsterziehung durch Yoga; Thielle 1961
Selvarajan Yesudian: Yoga und Schicksal; Stuttgart 1962
Selvarajan Yesudian: Raja-Yoga; Thielle 1966
Selvarajan Yesudian: Hatha-Yoga; München, Engelberg 1971
Selvarajan Yesudian: Steh auf und sei frei: Gedanken und Gespräche über Yoga; Ergolding 1989

Seundärliteratur

Mathias Tietke: Der Stammbaum des Yoga; Stuggart 2007. ISBN 3-89620-199-7
Wilfried Huchzermeyer: Das Yoga-Wörterbuch; Karlsrue 2007. ISBN 3-931172-25-1.
Susy Heim: Yoga-Unterricht und Praxis: Yoga nach Yesudian-Haich. Rorschacherberg 2009. ISBN 3-9520918-5-5.

Weblink