Asana

Vrikshasana oder de Bomm

Halasana oder de Pflueg

Adomukha Shvanasana oder de Hund wo mitem Chopf geg abe luegt

Shavasana oder d Liich

Asana (skt. आसन āsana- n. ‚Sitz‘) isch d Bizaichnig vonere Yogastellig und d Asanas bildet s dritti Gliid vom Yoga nochem Patañjali. Si sind e wichtige Bistandtail vom Hatha Yoga.

Asana im klassische Yoga

Noch de Öberliferig gits es 8'400'000 Asanas, för jedi Art vo Lebiwese aini. De Gott Shiva chennt si ali, aber nu 84 sind vorzüglich und grad 32 gaignet för de Mentsch. S best Asana isch s Siddhasana („Sitz vom Volchommne“), wo regelmäässig uusgfüert zur Erlösig füeri und denn chunnt s Padmasana („Lotussitz“), wo vo Chranket und Breste bifraiji. D Asanas hend all e Name und werdet hüüfig noch Tier (Fisch, Schkorpioo, Pfau, Hoigümper), mythische Wese (Garuda, Virabbhadra) oder wichtige Yogi (Goraksha, Matsyendra) binennt. Mengisch isch d Bizaichnig au nu e technische Bigriff, wie Padahastasana („Fuesshandstellig“). S Ziil vo de Asanas isch, as de Yogi Disziplin, Biwusstsi und Konzentration stärcht und au e gsunde Körper öberchunnt, demit er umso chräftiger de spirituelli Weeg goo cha. Si sind weniger e spirituells Ziil, wo erraicht were mue, sondern me e Hilfsmittel und e Vorberaitig för de aaspruchsvolleri Raja Yoga.

Arte vo Asanas

D Zaal vo 84 bzw. 32 Asanas i de klassische Literatur het natürli nume e symbolischi Bidüttig. D Aazal vo de Asanas iischliessli vo de uuzälige Variante cha gär nöd festglait werde. De BKS Iyengar bischribt i sim Buech 200 Asanas. Si chönet je noch Art vo de Endstelig und Würkig gruppiert werde.

Sitzhaltige wie de Lotussitz, hend maist s Ziil, as de Yogi möglichst lang biquem i de Meditation sitze cha, Balanceüebige wie de Bomm förderet d Konzentratio und s Glichgwicht, Umcherstellige wie de Chopfstand sölet em Yogi zaige, as d Welt au usere andere Sicht aglueget werde cha. Vili Asanas hend e starchi Uuswürkig uf d Wirbelsüüli und Biweglichkait. Anderi Asanas dienet nume as Vorbiraitig för schwereri Stelige. Demit e Schüeler sin Körper nöd aisitig träniert, gits es au festgschribnig Asanaraije, wie d Rishikeshraije, wie si de Swami Sivananda glehrt het oder de Sunegruez.

D Asanas weret möglichst entspannt uusgüebt und langsam glernt; e Forciere cha sich gegetailig uuswürke und gär zu Schäde füere. Gwüssi Schuele bruuchet aber as Hilfsmittel au Bänder, Saili und Holzchlötz, die maiste chömet aber ooni Hilfsmittel uus. Wichtig isch de Oote, me schnuuft sich sozsäge i d Stellig ine. En Asana isch denn korrekt uusgfüert, wenn s entspannt längeri Ziit ghalte werde cha. S Ziil im Yoga sind nöd akrobatischi Kunststückli oder en gschmaidige jugedliche Körper, sondern d Förderig vo Kozentration verbunde mit de Biruigig vom Gaist. E längers Verwiile inere Stelig – je noch Asana e paar Minute oder Stunde – cha zu tüüfere Erfaarige füere und dodemit s Biwusstsii schuele.

Ainzelni Asanas

• Shavasana („Liichehaltig“) isch e Ruelaag ufem Rugge zum Entspane.
• Makarasana („Delfiin“) isch e Ruelaag ufem Buuch zum Entspane.
• Padmasana („Lotussitz“) isch e gaigneti Sitzhaltig zum länger Meditiere.
• Siddhasana („Sitz vom Vollendete“) werd empfole för Pranayama (Schnuufüebige).
• Tadasana („Bergstellig“) isch en aifache uufrechte Stand.
• Vrikshasana („Bommstelig“) isch e Stand uf amm Bai und förderet s Gliichgwicht.
• Pashcimottanasana („Föörschiibüügi“) isch e schweeri Üebig, wo d Deenig vo de hindere Baimuskle und em Rugge förderet.
• Bhujangasana („Schlange“ oder „Kobra“) stärcht d Ruggemuskulatur.
• Trikonasana („Drüüegg“) isch e sitlichi Büügi usem Stand.
• Ardha Matsyendrasana („Halbe Matsyendrasitz“) isch e Verdrülig vo de ganze Wirbelsüüli im Sitze.
• Sarvangasana („Schulterestand“ oder „Cherze“) isch e Umcheerstelig.
• Shirshasana („Chopfstand“) isch e Umcherstelig und förderet Dörbluetig vom Chopf.

Büecher

• BKS Iyengar: Licht auf Yoga. ISBN 3-502-61166-0
• Erling Petersen: Yoga: Münche 2007. ISBN 3-453-17963-9
• Vishnu-devananda: Das grosse illustrierte Yoga-Buch. ISBN 3-89901-183-8
• Selvarajan Yesudian: Sport + Yoga; Thielle 1949