Vivekananda

Us der alemannische Wikipedia, der freie Dialäkt-Enzyklopedy
de Vivekananda

De Swami Vivekananda (skt. Vivekānanda; * 12. Jänner 1863 z Kalkutta; † 4. Juli 1902 z Haora) isch en Reformer vom Hinduismus und Bigründer vo de Ramakrishna-Biwegig. Er het massgeblich dezue biitrait as de Hinduismus im Weste as ernsthafti Religioo aglueget werd und het för e Zämehalt vo allne Relegioone plädiert.

s Lebe[ändere | Quälltäxt bearbeite]

De Swami Vivekananda isch as Narendranath Datta am 12. Jänner 1863 z Kalkutta uf d Welt cho. Er het e englischi Schuelbildig gnosse und isch e hochbildete Akademiker gsii, wo mit de westliche Denkwiis vertraut gsii isch. Mit achtzeni het er de indischi Hailigi Ramakrishna (1836–1886) uufgsuecht und isch denn underem Name Vivekananda sin engste Schüeler wore. Wo de Ramakrishna im Sterbe glegen isch, het er de Vivekananda as sin Noofolger bistimmt.

De Vivekananda het sich denn in Himalaya zruggzoge zum Meditiere. Im Summer 1890 isch er för e Pilgerrais dör ganz Indie uufbroche und isch ends 1892 am Kap Kanyakumari (Kap Komorin) z Tamil Nadu aachoo. Er isch denn uf Chicago gschickt wore, um as Vertreter vom Hinduismus am Weltparlament vo de Religione (World Parliament of Religions) tailznee. Sini Reede sind mit Bigaisterig uufgnoo wore und er het müese entgege de Plän jede Taag e Reed halte, well d Noofroog ase gross gsii isch. Denn er het im Gegesatz zu vill anderne Redner nöd sini Religioo as di anzig woori und allerbesti deklariert, sondern för Aihait und Toleranz fo allne Religione plädiert.

Dör die Rede isch er zunderainisch e Weltgröössi wore und isch drufabe i de Staate umegraist und het uuzäligi Vorträg ghalte und z New York d Vedanta Society ggründet. 1985 isch er uf Paris und denn uf England, woner d Margaret Noble troffe het, wo denn underem Name Sister Nivedita aini vo sinene engste Aahänger woren isch. Im Summer 1896 isch er i d Schwiz graist, um sich i de Alpe z erhole. Dai het er e Brief vom tütsche Indolog Prof. Paul Deussen öberchoo, wonen uf Tütschland iiglade het. De Vivekananda het Heidelberg, Köln, Berlin und Kiel bsuecht, woner de Paul Deussen troffe het. 1897 isch er denn uf Indie zrugg und as Hailige gfiiret wore.

Ane 1899 isch er nomol uf Amerika graist und ane 1900 het er amene Kongress för Religiosgschicht z Paris tailgnoo. Er isch drufabe uf Indie zrugg, woner em 4. Juli 1901 z Haora gstorben isch.

d Philosophii[ändere | Quälltäxt bearbeite]

De Vivekanadna het de hinduistischi Vedanta as Chroone vo de Religione prise, well er sich mit allne Religioone veriibare lös und au mit de Evolutionstheorie vom Charles Darwin veriibaar sai. S Göttliche (skt. brahman) werd nöd persönlich vorgstellt und onöd mit bsundrige Ritual vereert. D Seel stiigt i drai Stuufen uuf. I de underste Stuufe füelt si sich vo Gott trennt, i de mittlere füelt si sich mit Gott verbunde, emfindet sich aber as verschide vom Göttliche und ide höchste Stufe erlangt d Seel volchomes Aissii mit Gott.

De Vivekananda het au de klassischi Yoga, wien er i de Bhagavadgita und vom Patañjali glehrt werd i sini Philosophii uufgnoo. De Bhakti Yoga bidütet Opfer und Liebi zum Göttliche. De Karma Yoga isch Nöchsteliebi und selbstloses Handle, well Gott i jedem Wese wont. De Raja Yoga entsprecht em achtglidrige Yoga vom Patañjali und de Jñana Yoga isch de Weg vo de rechte Erchenntnis, as d Welt nume e Spiil vo Gott isch, e Mischig zwüschet Würklichem und Nödwürklichem.

Uuszüüg vo sinere Reed am Weltkongress voi de Religione[ändere | Quälltäxt bearbeite]

„I bi stolz zunere Religioo zghöre, wo a de Welt Toleranz und universelli Aanaam vermittlet het. Mer globet nöd nu ane groosszügigi Toleranz, sondern haltet au ali Religioone as woor!”
„De Christ söll nöd Hindu oder Buddhist were, no söl e Hindu oder Buddhist Christ were, aber jede mue de Gaist vom andere uufnee und doch sini Inidividualität ufrechthalte und gmääss em aigne Gsetz lebe.”
„Hailigkait, Rainhait und Mildtätigkait ghöret nöd uusschliessli z ainere Chile i de Welt und jedes System het Mane und Fraue mit erhabnem Charakter förebroocht. Mit Blick uf da tueni vo ganzem Herze all die bimitlaide, wo uusschliessli vom Öberlebe vo de aigne Religioo troimed und vo de Zerstöörig vo de anderne.”

Werch[ändere | Quälltäxt bearbeite]

Literatur[ändere | Quälltäxt bearbeite]

Weblink[ändere | Quälltäxt bearbeite]