Themistokles

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Themistokles (griechisch Θεμιστοκλῆς, * um 525 v. d. Z.; † um 459 v. d. Z. z Magnesia am Mäander) isch e Staatsmaa und Fäldheer vo Athen gsi in dr Zit vo de Perserchrieg. Er het d Athener in dr Seeschlacht vo Salamis zum Siig gfüert und het dr Wääg vo Athen zur Demokratii ufdoo.

Lääbe[ändere | Quälltäxt bearbeite]

En Abbildig, wo mit em Themistokles identifiziert wird

Dr Themistokles isch dr Soon vom Neokles us em alt-attische und aagseene Aadelsgschlächt vo de Lykomide (Lykomidai) gsi. Wil si Mueter kä Athenere gsi isch, isch dr Themistokles nit „vollbürtig“ gsi und het an de Üebige in de Ringschuele vo dr Akademii und vom Lykeion nid döfe mitmache. Die mäiste Historiker näämen an, ass dr Mnesiphilos, wo d Filosofii noch em Solon gleert het, si Leerer gsi isch.

Wo d Athener 510 v. d. Z. iire letschti Tyrann, dr Hippias, us dr Stadt verdriibe häi, het dr Kleisthenes dr Polis e nöiji Verfassig gee, wo bräitere Schichte vom Volk (demos) s Rächt gee het, sich politisch in dr Stadt z bedäilige.

Eso het au dr Themistokles in politischi Ämter chönne gweelt wärde. Vo 493 bis 492 v. d. Z. isch er Archont gsi. Wil mä en Inwasioon vo de Perser erwartet het, het er zum die athenischi Flotte z versterke dr Haafe vo Piräus lo vergrössere und zwäihundert Chriegsschiff lo baue. Er isch zum Strategos gweelt worde und het in dr Schlacht vo Salamis im Joor 480 die persischi Flotte vom Groossköönig Xerxes I. usmanöwriert und gschlaage.

Fundstück zum Bewiis vom Schärbegricht gegen e Themistokles

Für zum d Stadt gege Sparta z schütze, het dr Themistokles e Muure um Athen lo baue. Wäge däm und wäge de Vorwürf, ass er em Spartaner Leonidas I. bi dr Verdäidigung vo de Thermopyle käi Hilfe gschiggt häig und vor dr Schlacht vo Salamis Athen für nüt häig lo ewakiere, isch er um 471 v. d. Z. vom Schärbegricht verbannt und zum Dood verurdäilt worde. Er isch uf Persie gflüchdet, und dr Köönig Artaxerxes I. het en as Satrap vo Lampsakos, Myus und Magnesia am Mäander iigsetzt. Dr Thukydides verzellt, ass im Joor 461 dr Artaxerxes d Grieche wider häig welle aagriffe und im Themistokles dr Befääl über die persischi Flotte aabote häig. Dä häig aber nid gege si Häimet welle kämpfe und häig sich lieber sälber umbrocht.[1]

Kwelle[ändere | Quälltäxt bearbeite]

Litratuur[ändere | Quälltäxt bearbeite]

  • Albrecht Behmel: Themistokles. Sieger von Salamis und Herr von Magnesia. 2. Auflage. ibidem-Verlag, Stuttgart 2002, ISBN 3-89821-172-X.
  • Wolfgang Blösel: Themistokles bei Herodot. Spiegel Athens im fünften Jahrhundert. Studien zur Geschichte und historiographischen Konstruktion des griechischen Freiheitskampfes 480 v. Chr. Steiner, Stuttgart 2004, ISBN 3-515-08533-5 (Historia Einzelschriften Band 183).
  • Arthur P. Keaveney: The life and journey of Athenian statesman Themistocles (524-460 B. C.?) as a refugee in Persia. Mellen Press, Lewiston 2003, ISBN 0-7734-6809-9.

Weblingg[ändere | Quälltäxt bearbeite]

 Allmänd (Commons): Themistocles – Sammlig vo witere Multimediadateie

Fuessnoote[ändere | Quälltäxt bearbeite]

  1. Thukydides 1, 138, 4 (änglischi Übersetzig). Cornelius Nepos, Themistocles 10, 4. Diodor 11, 58 (englische Übersetzung). Plutarch, Themistokles 31 (änglischi Übersetzig).
Dä Artikel basiert uff ere fräie Übersetzig vum Artikel „Themistokles“ vu de dütsche Wikipedia.

E Liste vu de Autore un Versione isch do z finde.