Dr Ramstäinerhoof an dr Rittergass z Baasel

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Ramstäinerhoof an dr Rittergass 7-9
Dialäkt: Baseldütsch
Usschnitt us dr Aasicht vo dr Stadt Baasel vom Merian vo 1642[1]
D Riddergass zwüschen em Dalbeschwibbooge linggs und em Münsterblatz rächts
5: dr Ridderhoof
6: d Ulrichskiirche
7: s Münster

Dr Ramstäinerhoof isch e historischs Geböid an dr Rittergass 7-9 in dr Groossbaasler Altstadt. Er stoot uf dr Liste vo de Kulturgüeter im Kantoon Basel-Stadt, wo nazionaali Bedütig häi.

Gschicht[ändere | Quälltäxt bearbeite]

D Ramstäiner si e wichdigi Baasler Aadelsfamilie gsi. Si sin d Burghere z Gilgebärg, z Zwinge und z Laufe gsi und häi im 14. und 15. Joorhundert in dr Stadt immer wider hoochi gäistligi und wältligi Ämter gha, as Bürgermäister, Rootshere und Vögt. So grooss iire Iifluss isch, so grooss isch s Areal an dr Rittergass gsi, wo si gwoont häi, und isch vom Gässli hinder dr Ulrichskiirche bis zur Kiirche vo de Dütschritter gange. Si häi im spoote Middelalter zwäi Hööf gha dört, dr Chli Ramstäi (hüte d Liigeschaft Riddergass 22-24) und dr Grooss Ramstäi, grad wisawii vom Hoof vo de Thierstäiner. Dr Ridder Burkhard Werner vo Ramstäi isch dr erst bekannt Bsitzer vom Ramstäinerhoof gsi.[2] Uf däm Gebiet em Rhii nooch häi denn au d Rootbärger e Hoof baut (hüte Rittergass 25) und d Äbtissin vo Olsbärg het sich grad näbe dr Dütschridderkapälle im Olsbärgerhoof e pied a terre gläistet.[3]

Vo iirem Hoof us häi d Ramstäiner e groossartigi Ussicht über e Rhii und s Chläibaasel ghaa. Im Ramsteinerhoof si immer wider hoochi Here z Gast gsi, wie dr Bapst Felix V. wääred em Baasler Konzil oder 1473 dr Maximilian, wo spööter sälber Kaiser worde isch, won er mit em Kaiser Friedrich III. z Baasel verbii cho isch.[4]

D Rittergass isch au im 18. Joorhundert en aagsäiti Adrässe gsi und vili vo de Hüüser dört si in dere Zit umbaut worde. Au dr Ramstäinerhoof het denn e nöije Bsitzer gfunde, dr Samuel Burckhardt, wo drfür e halbi Million Pfund (das weere im Joor 1930 fast siibe Millione Schwizer Franke gsi) aanebletteret het, und das isch no ooni s Land gsi [5] und en im Stiil vom Barock het lo renowiere.

Fuessnoote[ändere | Quälltäxt bearbeite]

  1. Merian Basel 1642.jpg
    Die ganz Aasicht vo dr Stadt Baasel vom Merian vo 1642.
  2. «Ramstein, Burkhard Werner von» uf hls.ch
  3. Basel im vierzehnten Jahrhundert: Geschichtliche Darstellungen zur fünften Säcularfeier des Erdbebens am S. Lucastage 1356, Georg's Verlag, 1856, S. 26
  4. Us em Nunniger Dorfbuech: «Im Banne von Gilgenberg / Nunningen unter der Herrschaft der Ramsteiner» uf nunningen.ch, abgrüeft am 21. Januar 2014
  5. Lionel Gossman: Basel in the Age of Burckhardt: A Study in Unseasonable Ideas, University of Chicago Press, 2002, S. 45

47.5558777777787.5936138888889Koordinaten: 47° 33′ 21″ N, 7° 35′ 37″ O; CH1903: 611666 / 267252