Quttinirpaaq-Nationalpark

D Kartè vom Nationalpark Quttinirpaaq mit Tanquary, Lake Hazen und Fort Conger im Süde, und Ward-Hunt ganz im Norde.

Dr Quttinirpaaq-Nationalpark liggt ganz im Norde vo dr Ellesmere-Insle. Scho im Joor 1988 isch a groosse Teil vo däm Gebièt zum Schutzgebièt erklärt worde; im Joor 2001 isch denn die kanadischi Nationalpark-Verordnig gmacht worde. S ganzè Schutzgebièt isch nach Norde bis zur Ward-Hunt-Insle und zum Kap Columbia vergrösseret und zum Nationalpark erklärt worde. S Bewusstsy für Umwältschutz in de menschèläre Gebièt vo dr Arktis isch erscht mit de 90er-Joore cho und di kanadischi Armee het uf Gebièt, wo 50 Joor lang durchs Militär und durch d Forschig gnutzt worde sind, dr agsammleti Schrott noch Süde mitgno. Im Nordoschte und usserhalb vom Nationalpark liggt dr Militärstützpunggt Alert.

D Verwaltig betribt im Summer drei Stützpünggt im Nazionalpark, Tanquary Fiord im Südoschte, a zweite am Hazensee, und Fort Conger an dr Weschtküschte. Im Summer sind Parks Canada Ranger zuèständig für d Betreuig vo de wenigè Bsuèchr. In Tanquary Fiord isch e Pischte für STOL-Flugzüg. Wenn im Spootsummer dr Fiord iisfrei isch, könne Versorgigsschiff au grösseri Materialmängene vo Resolute Bay nach Tanguary Fiord bringe.

Quer durch de Nationalpark zièt e stark vrgletscherti Gebirgsketti wo stellewiis über 2500 Metr hoch isch. Weniger als 900 Kilometr vom Nordpol entfärnt verhindret si dass fièchti Luftmasse vom Arktische Ozean nach Süde kömme. Nördlich vo däre Gebirgsketti isch es hüffig näblig, abr südlich drvo im Summer wärend viile Wuche erstuunlich sunnig und warm. Im Zäntrum vom Nationalpark liggt nur 158 Metr hoch dr Hazensee. Dr Polarsummer duured doo rund 4 Mönet und d Lufttämpratuur cha bis uf +20 °C aastiige. Zwar rägnets sälte, abr gniègend Schmelzwässer vo Gletschr und Schneefäldr sind vorhande und entsprächnd het sich e riichi Flora und Fauna uf näärstoffriche Bööde entwigglet. Im Juli und Afang August isch es im flache Gländ saftig grièn und es bliè vili Planze. Biologè hän über 130 verschideni Pflanzenarte zellt. Sogar groosi Säuger finde entsprächend gnuèg Naarig, so Moschusochse, Karibu, Polarhaase und Lemming. Au Polarwölf und Füchs kömmed vor. D Park-Ranger händ in einigè Joor übr 200 Karibu und 2000 Moschusochse zellt. Wiè diè Tièr übr mehreri Mönet dr Polarwinter by völligr Dunkelheit und iisige Tämprature bis zué -50 °C überläbe isch erstuunlig. Im Summer gits au vili Vögl.

Galerii

• 
  D Ward-Hunt-Insle mit Landepischte und Zält, dr nördlichschti Teil vom Nationalpark. Bligg uf dr Nordküschte vo Ellesmere mit em Kap Columbia.
• 
  Tanquary Fiord mit Landepischte im Auguscht 1997.
• 
  D Nationalparkstation Tanquary Fiord im Summer 1997.
• 
  Dr Air Force Glacier nördlich vo Tanquary.
• 
  Typischi Landschaft am Hazensee mit bliènde Staibräch.
• 
  Scylla und Charybdis, zwei Gletschr in dr Tundra nordöschlich vo Tanquary
• 
  Blièndi Tundra im Nationalpark mit Eriophorum (Wullegraas).
• 
  Bliènde Steibräch (Saxifraga oppositifolia).
• 
  Dä Zwärgstruuch isch e Wiide (Salix arctica).
• 
  Muschusochse in dr Tundra vom kanadische Arktisarchipel [Juni 1998].
• 
  Twin Otter STOL-Flugzüg uf dr Ward-Hunt-Insle. Ufnaam vo 1988, bevor es d Nationalpark gä het.
• 
  D Hauptgebirgsketti im Norde vom Nationalpark.
• 
  Dr Mount Barbeau, mit 2616 Metr dr höchschti Bärg uf dr Ellesmere-Insle.
• 
  Osborn Range, Gebirgsketti im Nordweschte vo Tanguary Fiord, am Rand vom Nationalpark.

Weblink

 Commons: Quttinirpaaq-Nationalpark – Sammlig vo Multimediadateie

• Quttinirpaaq National Park uf Parks Canada