Plaine-Morte-Gletscher

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Der Plaine-Morte-Gletscher bim Wildstrubel
Bärgstation vo der Seilbaan oben a Crans-Montana

Der Plaine-Morte-Gletscher (oder au Wildstrubelgletscher; französisch Glacier de la Plaine Morte) isch en Gletscher i de Bärner Alpe. Er ligt im ene höche Bärgtal südlech vom Wildstrubel uf em Biet vo der Gmeind Lengg im Kanton Bärn.

Das Tal foot zwüschem Schneehore, emene Usläufer vom Wildstrubel, uf der Nordsyte und em Bärggrat Les Faverges a, goot vier Kilometer gäge Weschte und sinkt den westlech vom Wildstrubel gäge Norde zum steile Tal vom Trüebbach abe; der Trüebbach isch eine vo de Quellbech vo der Simme.

Über d Bärgchetti südlech vom Tal und näbem Gletscher lauft d Kantonsgränze vom Kanton Bärn zum Kanton Wallis. D Bärge uf der Gränze heisse Tothore ( französisch: Sex Mort), Pointe de la Plaine Morte und Wisshore. Ganz im Kanton Bärn isch de no als Abschluss vom Bärgchranz rund ume Gletscher s Gletscherhore.

Das höche Tal zwüsche dene Bärge isch wyt ufe mid em Ysch vom Gletscher gfüllt und bildet e grossi Schneeflechi uf 2700 bis 2800 Meter über der Meereshöchi. Dört wo s Ysch gäge s Simmetal abefliesst, isch no e chlyni Gletscherzunge, wo der Name Rezligletscher het. A däm entspringt der Trüebbach uf 2470 Meter.

Am obere Ändi vom Tal bildet sech östlech vom Yschrügge en Gletschersee, wo zum grosse Deil uf em Biet vom Kanton Wallis i der Gmeind Crans-Montana ligt. Us däm See flüsst über de Bärgsaddel oberhalb vo der Alp Outannes e Schmelzwasserbach gäge Süde abe. Das isch der Afang vom Bärgbach Tièche, wo der Hauptzuefluss vo der Raspille git, em Gränzbach zwüschem dütschsproochige Oberwallis und em französischsprooochige Underwallis. Do dermit cha me gseh, dass s Schmelzwasser vom Wildstrubelgletscher glychzytig gäge Norde zum Rhy und i d Nordsee und gäge Süde i d Roone und denn is Middelmeer flüsst.

Der Gletscher hed en Lengi vo öppe föif Kilometer. Mid em wermere Klima i de Alpe isch der Gletscher sid em früene 20. Joorhundert starch abgschmulze.

Vo Crans-Montana us goot e Säilbaan zu der Pointe de la Plaine Morte. Im Winter cha me vo dört bis i d Feriestazion abe schiifaare. Ufem wyte Gletscher isch e Loipe zum Langlaufe gmacht, wo men au im Summer cha treniere.