Muhterem Aras

Dialäkt: Undermarkgreflerisch

d Muhterem Aras (2013)

D Muhterem Aras (* 2. Jänner 1966 z Elmaagaca bi Bingöl, Tirkei) isch e dytschi Bolitikeri (Bindnis 90/Di Griene). Si giltet as di erscht Abgeordnet mit Migrationshintergrund, wu diräkt in e dytsche Landdag gwehlt woren isch un di erscht Muslima im Landdag vu Bade-Wirttebärg. Syt em 11. Mai 2016 isch si Landdagsbresidänti.

Uusbildig un Beruef

D Aras isch in dr Tirkei in eme anatolische Dorf as Dochter vu alevitische Kurden uf d Wält chuu un isch anne 1978 mit ihre Eltere un Gschwister uf Filderstadt chuu. Si het z Nirdenge di Mittler Ryfi un derno 1989 am berueflige Gymnasium Friedrich-von-Cotta-Schule z Stuegert s Abitur gmacht. No dr Schuel het si an dr Universität Hohenheim Wirtschaftswisseschafte studiert. Anne 1999 het si z Stuegert e Styyrberotigsbiro grindet. Si isch Mitglid vum Ufsichtsrot vu dr staatlige Toto-Lotto GmbH un vum Byrot Sid vu dr SV vu SparkassenVersicherungen.

Bolitik

Ihri bolitisch Laufbahn het anne 1992 mit em Yydritt bi dr Grienen aagfange. E erscht Mandat het si no dr Kommunalwahl 1999 im Gmaindsrot vu Stuegert ibernuu. Dert isch si vu 2007 bis 2011 Fraktionsvorsitzeri vu ihre Bartei gsii. Syt Juli 2014 ich si Vorsitzeri vum Kraisverband vu dr Griene z Stuegert.

Bi dr Landdagswahl z Bade-Wirttebärg 2011 het si s Diräktmandat im Wahlkrais Stuegert I mit 42,5 % vu dr Stimme gwunne. Si isch Mitglid un dr Uusschiss fir Finanzen un Wirtschaft un fir Kultur, Juged un Sport. Derzue isch si au finanzbolitischi Sprächeri in dr Griene-Fraktion.

Anne 2016 het si wider im Wahlkrais Stuegert I kandidiert un het s Mandat mit 42,4 Brozänt gwunne, wie sco 2011 wider mit em landeswyt beschte Ergebnis fir ihri Bartei.

Am 11. Mai 2016 isch d Aras mit 96 Stimme zue dr neie bade-wirttebärgische Landdagsbresidänti gwehlt wore. Si isch dodermit dytschlandwyt s erscht Mitglid vu dr Grienen un z Bade-Wirttebärg di erscht Frau in däm Amt.

Ehreamt

D Aras isch Mitglid vu dr Heinrich-Böll-Stiftung Baden-Württemberg e. V., vum Bund für Umwelt und Naturschutz Deutschland (BUND), vum Tollhaus e. V., vu dr Freunde und Förderer des Altenzentrums Zamenhof und Haus Hasenberg e. V., vum Förderverein der Nesin-Stiftung (FöNes) e. V. un vum MTV Stuttgart 1843 e. V.

Familie

D Muhterem Aras isch syt 1986 ghyrote mit em Sami Aras un het mit em e Suhn un e Dochter.

Weblink

 Commons: Muhterem Aras – Sammlig vo Multimediadateie

• Internetbresänz vu dr Muhterem Aras
• Uuszug us em Abgordnete-Handbuech vum Landtag vu Bade-Wirttebärg fir di 15. Wahlperiod
• Profilsyte Landdagsfraktion
• Muhterem Aras uf abgeordnetenwatch.de
• Vom anatolischen Mädchen zur schwäbischen Politikerin, Deutsche Islamkonferenz
• Michael Schwarz: Die Expertin fürs liebe Geld , Mannheimer Morgen, 4. Merz 2014

Dä Artikel basiert uff ere fräie Übersetzig vu dere Version vum Artikel „Muhterem_Aras“ vu de dütsche Wikipedia. E Liste vu de Autore un Versione isch do z finde.