Michael VIII.

Michael VIII.
Kaiser vo Nikaia und Kaiser vom Byzantinische Riich
Dr Michael VIII.
Regierigsziit	1259–1261 (as Kaiser vof Nikaia, mit em Johannes IV.) 1261–1282 (mit em Andronikos II. vo 1272)
Uf d Wält cho	1223
Gstorbe	11. Dezämber 1282 (im Alter vo 58)
Dodesort	Pachomion, in dr Nööchi vo Lysimachia
Vorgänger	Johannes IV.
Nochfolger	Andronikos II.
Verhürotet mit	Theodora Dukaina Vatatzaina

Hyperpyron, Michael VIII.

Gold-Hyperpyron, Michael VIII.

Dr Michael VIII. Dukas Komnenos Palaiologos (middelgriech. Μιχαὴλ Η' Δούκας Κομνηνός Παλαιολόγος, * 1224/1225 in Chläiasie; † 11. Dezämber 1282 z Thrakie) isch vo 1259 bis zu sim Dood 1282 dr byzantinisch Kaiser gsi. Wo si General Alexios Strategopulos in dr Nacht zum 25. Juli 1261 Konstantinopel im Handsträich iignoo het, het das s Ändi vom latiinische Kaiserdum bedütet und s byzantinische Kaiserdum isch uferstande.

Lääbe

Dr Michael isch as Soon vom Andronikos Palaiologos und däm sinere Frau Theodora ufgwaggse und het e Blitzkarriere gmacht. Scho 1246 isch er Guvernöör vo Melnik und Serrhai worde, 1252 Groosskonstabler und 1258 Despot. S Volk het en am 1. Januar 1259 zum Kaiser usgrüeft. Dr Michael het sich zum Kaiser lo chrööne und het si Schützling Johannes IV. in dr Hindergrund drängt. Das het em Patriarch Arsenios Autoreianos nid gfalle und er het en lo absetze. Wäge däm het dr Arsenitestrit aagfange, wo bis 1310 die byzantinischi Chille gspalte het. 1253 het dr Michael d Theodora Dukaina Batatzaina (* 1240; † 1303) ghürootet.

Vo 1259 aa het er z Nikaia (Nicäa) regiert, noch dr Befreijig vo Konstantinopel vom latiinische Kaiser Balduin II. isch er 1261 dört iizooge und het vo dört us afo regiere. Dr Droonfolger Johannes Laskaris, wo immer no z Nikaia gsi isch, het er gfange gnoo und lo blände.

In de Joor druf het er e Hufe milidäärischi Siig errunge, under anderem 1259 gegen e westligi Allianz bi Pelagonia z Makedonie, 1262 gege d Bulgare, 1264 in Epiros. Dr Karl I. vo Anjou het denn 1266 dr Stauferköönig Manfred vo Sizilie besigt und däm si Köönigriich in Underitalie und Sizilie übernoo. Dr Karl het sich 1267 mit em verdriibene latiinische Kaiser Balduin und em Fürst vo Achaia (Peloponnes) Wilhelm II. vo Villehardouin verbündet und e Fäldzuug gege Konstantinopel afo vorberäite. Dr Michael VIII. het denn mit em Babst über en Union vo der orthodoxe und latiinische Chille afo verhandle, für dass dr Babst e nöije Chrüzzuug gege Konstantinopel nid wurd understütze. Die orthodoxi Chille, d Aristokratii und s Volk si drgeege gsi, aber dr Michael ene d Union ufzwunge. Uf em zwäite Konzil vo Lyon 1274 isch d Union vo dr orthodoxe und dr latiinische Chille verkünde worde, gegen e Widerstand von e Hufe byzantinische Grieche. D Bäbst wo denn choo si, häi nid glaubt, ass d Byzantiner es mit dr Union Ärnst mäine; dr Karl I. vo Anjou het witer si Fäldzuug vorberäitet, dr nöiji französischi Babst Martin IV. het sich 1281 für e Chrüzzuug usgsproche und dr Michael VIII. exkommuniziert. Dr Kaiser het denn Kontakt zum König Peter III. vo Aragon ufgnoo, won e alte Find vom Karl I. gsi isch, und zu opposizionelle Grubbe in Sizilie. Die byzantinischi (Ghäim-)Diplomatii und byzantinischs Gäld häi z Sizilie im Merz 1282 en Ufstand gegen e Karl I. usglööst (Sizilianischi Vesper), und dä het sini Chrüzzuugsblään müesse ufgee. Im August 1282 isch dr Peter III. in Sizilie glandet und het d Drubbe vom Karl verdriibe.

Gege s Ändi vo sinere Herrschaft het sich dr Michael mit em Kaiserriich Trapezunt under em Johannes II. müesse abgee. Er het vom Johannes verlangt, ass er dr Ditel Kaiser vo de Romäer, won är und sini Vorgänger brucht häi, söll ufgee. Dr Michael het s Gebiet, wo vo Trapezunt beherrscht worden isch und wo früener byzantinisch gsi isch, immer no as Däil vom byzantinische Riich betrachtet und nume dr Herrscher z Konstantinopel het dr Kaiserditel döfe füere. Dr Johannes het zerst nid noochgee. Dr Michael het em denn d Hand vo sinere dritte Dochder Eudokia Palaiologina gee. 1282 häi die bäide z Konstantinopel ghürootet und vo denn aa het dr Johannes dr Ditel Kaiser vo de Romäer nüm brucht.

Noch em Michael VIII. sim Dood am 11. Dezämber 1282 isch si Soon Andronikos II. Palaiologos uf e byzantinisch Kaiserdroon cho. D Palaiologe häi denn Byzanz bis zum Fall vo Konstantinopel im Joor 1453 regiert.

Litratuur

• Henri Grégoire (Hrsg.): Imperatoris Michaelis Palaeologi De vita sua. In: Byzantion. Band 29-30, 1959-1960, S. 447–476.
• Donald M. Nicol: The Last Centuries of Byzantium, 1261–1453. Cambridge University Press 1993, S. 39–90.

Fuessnoote

Vorgänger Johannes IV.

Kaiser vo Byzanz 1261–1282

Nochfolger Andronikos II.

Dä Artikel basiert uff ere fräie Übersetzig vum Artikel „Michael_VIII.“ vu de dütsche Wikipedia. E Liste vu de Autore un Versione isch do z finde.