Max Grieder

Dr Ernst Max Grieder (* 28. Juni 1908 z Buckte; † 23. Meie 1973 z Gälterchinde) isch e Leerer und Schuelinschpäkter gsi. Är isch reformiert und Bürger vo Diegte gsi.

Sys Läbe

Dr Max Grieder isch dr Soon vom Emil Grieder, Primarleerer, drno kantonale Polizeischef und dr Marie Schmutz gsi. Är het 1942 d Elsa Maria Gass vo Prattele ghürotet.

Usbildig und Würke

Dr Max Grieder isch in d Bezirksschuel z Waldeburg und in die Oberi Realschuel z Basel gange. Drno het är z Basel Matematik, Füsik, Botanik und Zoologi gschtudiert. Är het s Mittelschuelleerer- und s eidgenössischi Turnleererdiplom gmacht. Dr Max Grieder het als Leerer vo 1933 bis 1954 an dr Bezirksschuel z Böckte, drno als Rektor an dr Realschuel (Bezirksschuel) Gälterchinde Schuel gee. Vo 1963 bis 1979 isch är kantonale Schuelinschpäkter für Primar- und Realschuele (Sek.) gsi.

Witeri Ysätz

Dr Max Grieder isch im Militär Oberscht gsi. Als yfrige Schütz isch är vo 1959 bis 1968 und 1973 Presidänt vo dr Kantonalschützegsellschaft gsi. Är isch e Förderer vom Baselbieter Militär-, Turn- und Schiesswäse gsi. Dr Max Grieder het s Presidium vom Rotary-Club Sissech/Oberbaselbiet gha. Är isch wältaaschaulich e grosse Tradizionalischt gsi und het sich schwer do mit de im Joor 1968 ysetzende Reforme in dr Erzyig und Schuel.

Literarischi Verwys

• Martin Ernst in: Basellandschaftliche Zeitung 26.5.1973
• jt. in: Basler Nachrichten 26.5.1973

Extärne Verwys

• Dr Ernst Max Grieder im Persone Lexikon vom Kanton Basel Landschaft
• Dr Ernst Max Grieder im Portraitarchiv