Mattea Meyer

Us der alemannische Wikipedia, der freie Dialäkt-Enzyklopedy
D Mattea Meyer im 2019

D Mattea Julia Meyer (gebore am 9. Novämber 1987 in Basel) isch e Schwiizer Politikerin vo dr Sozialdemokratische Partei (SP), es Mitglied vom Nazionalroot sit em 2015 und d Ko-Presidäntin vo dr SP sit ane 2020.[1]

Früeche Wärdegang und Usbildig[ändere | Quälltäxt bearbeite]

D' Mattea Meyer isch in Basel gebore, aber ufgwachse isch si in Winterthur im Kanton Züri. Zwüsche 2007 und 2015 het sie an dr Universität vo Züri Gschicht, Geografie und Politikwüsseschaffte studiert.[2] Im 2015 het si mit eme Master in Humaner und Wirtschaftlicher Geografie ihre Studie abgschlosse.[1] Während ihrer Studiezyt, het si au es Semester an dr Universität vo Aix-Marseille kha, wo sie au an Studenteprotescht teilgnoh het.[2]

Politische Wärdegang[ändere | Quälltäxt bearbeite]

D Mattea Meyer isch zwüsche 2009 und 2013 d Vize-Presidäntin vo de Jungsozialischt*Inne (JUSO) gsi.[1] Vom 2010 bis im 2011 isch si im Grosse Gmeindsroot vo Winterthur gsi.[1] Vo 2011 bis im 2015 het si für d SP denn im Kantonsroot vo Züri politisiert.[1] Im 2015 isch si widr in dr Kantonsroot gwählt worde, aber scho im April vom gliiche Joor isch si vo dr SP als e Kandidatin für dr Nazionalroot ufgstelt worde.[3] Sit em Novämber 2015, politisiert si für d SP im Nazionalroot.[4] D Mattea Meyer isch in de Wahle vo 2019[1] und 2023 jewiils in dr Nazionalroot wiedergwählt worde.[5]

In ihrer erschte Legislatur het sie in dr Finanzkommision iisitz gno und bis ins 2017 s Vizepresidium vo dr Immunitätskommision übernoh.[1] Im 2017 isch d Mattea Meyer denn d Presidäntin vo dr Immunitätskommision worde.[1] In ihrer zwäite Legislatur, het si in dr Kommision für soziali Sicherheit und Gsundheit iisitz gno, und isch au in dr Immunitätskommision bliibe, wenn au nümmi als Presidäntin.[1] Im Dezämber 2019 het d Mattea Meyer aakündigt, dass si sich zämme mit em Cédric Wermuth e Kandidatur für es Ko-Präsidium vo dr SP ka vorstelle.[6] D Jacqueline Badran, e bekannti SP Politikerin vo Züri, het si unterstützt und zugseit dass sie nur denn würdi s Vizepräsidium vo dr SP übernäh, falls die beide au gwählt wärde.[7] D Mattea Meyer und dr Cerdic Wermuth sind denn am 17 Oktober 2020 ins Ko-Präsidium gewählt worde.[8]

Politischi Standpünkt[ändere | Quälltäxt bearbeite]

D Mattea Meyer isch e linki Politikerin und isch dr Aasischt dass ihri Partei die Linke Wärt im Vergliich zu andere Europäische Sozialdemokratische Parteie besser verträtte tuet.[9] Si setzt sich stark für d Asylbewärber und Sans Papiers ii, isch im 2018 au d Presidäntin vom Schwizerische Arbeiterhilfwärk (SAH) worde, wo sich um die brueflichi Integration vo Asylbewärber duet kümmere.[10] Das Amt het si im 2020 denn an d Tessinder SP Ständeröötin Marina Carobbio witergäh.[11] Si isch dr Aasicht dass d'Menscherächt für alli zelle und nit nur für die miteme Schwizer Pass und dass Länder wo Waffe in Kriegsgebiet düen exportiere, au d'Tüüre für Asylbewärber sölle offe bhalte.[7]

Persönlich[ändere | Quälltäxt bearbeite]

D Mattea Meyer isch inere Partnerschaft mit em SP Politiker Patrick Kistler,[12]und het zwei Kinder.[13] Ihri Bürgergort sind Opfikon und Villmergen.[1]

Äinzelnoochwiis[ändere | Quälltäxt bearbeite]

  1. 1,00 1,01 1,02 1,03 1,04 1,05 1,06 1,07 1,08 1,09 Ratsmitglied ansehen.
  2. 2,0 2,1 Mattea Meyer, *1987, Politikerin, Nationalrätin, Co-Präsidentin SP Schweiz - Winterthur Glossar.
  3. Das neue Supertalent heisst Mattea Meyer | NZZ.
  4. Mattea Meyer.
  5. Hübscher gewählt, Schläpfer fliegt raus Delia Bachmann, Fabienne Grimm, Der Landbote
  6. Mattea Meyer und Cédric Wermuth kandidieren gemeinsam für SP-Spitze | NZZ.
  7. 7,0 7,1 «‹Refugees welcome› ist für mich eine Antwort auf den Zynismus» (de) Daniel Ryser, Republik
  8. Neues SP-Präsidium - SP wählt Mattea Meyer und Cédric Wermuth an die Parteispitze.
  9. Doerte Letzmann: Links in der Konkordanz (de) 16 September 2021.
  10. Mattea Meyer Winterthurer Glossar
  11. Medienmitteilung - Neue Präsidentin SAH Schweiz Schweizerischer Arbeiterhilfwerk
  12. SP-Politikerin Mattea Meyer wird Mama Schwizer Illustrieri
  13. Mattea Meyer (33) ist zum zweiten Mal Mami