Dr Mathis Eberler vo Villige

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

Dr Mathis Eberler vo Villige (au Mathis Eberlin, gstorbe am 6. Juni 1437 z Baasel) isch e Mitgliid vo dr bedütende Bürgerfamilie Eberler gnennt Grünenzwig im spoote 14. und früeje 15. Joorhundert gsi.

Dr Mathis Eberler vo Villige, wo dr Biinaame dr Schlosser ghaa het, isch 1393 us Villige uf Baasel kho. Am 16. Novämber 1393 isch er mit de Baasler Drubbe uf Muttez zooge. Das isch zwar umbluetig usgange, aber die, wo am Sträifzug mitgmacht häi, häi gratis s Baasler Bürgerrächt überchoo.

1404 isch dr Eberler scho mit dr Anna, dr Witwe vom Henman Schlegel, gnennt Grünenzweig vo Ettige, verhürootet gsi. Im Joor 1448 het d Anna no gläbt. Mer wüsse vo vier Kinder, zwäi Söön und zwäi Döchder. D Dochder Anna het dr riich Henman vo Tunsel ghürootet, wo vo 1428-1433 Oberstzumftmäister gsi isch, die anderi, d Katharina, het schiint s as Jumpfere bi iirer verhürootete Schwöster gläbt. Dr elteri Soon het wie dr Vater Mathis ghäisse und wird 1421 zum erste Mol im Stüürregister erwäänt, das häisst, ass er denn scho verhürootet gsi isch. Si Frau Anna isch d Dochder vom Wääber Hans Stör gsi und von ere Spitzebärg. Dr jüngeri Soon het Heinrich ghäisse und isch au under em Naame Grünenzwig bekannt.

Im Eberler si politischi Karriere[ändere | Quälltäxt bearbeite]

Bis 1404 isch dr Eberler Mitgliid in dr Handwärkerzumft zu Schmiid gsi, isch denn aber in d Herezumft zum Schlüssel iidräte. 1412 isch er Säggser worde und 1414 isch er für d Zumft e Joor lang im Root gsässe. Vo 1420 bis 1425 isch er Zumftmäister gsi und vo 1426 bis 28 wider Rootsher. In dere Periode, vo 1420 bis 1428, isch er as Siibenerher Mitgliid im stedtische Finanzkollegium gsi, wo sich um e Schatz, s Iikomme und s Umgäld kümmeret het. Er isch zwäimol Mitgliid vom Stadtgricht gsi, vo 1427 bis 1429 und wider 1436.

S Durnier zwüschen em Don Merlo und em Heinrich vo Ramstäi uf em Münsterblatz, wie sich das dr Karl Jauslin vorgstellt het.

Dr Eberler het sis Bürgerrächt sim Milidäärdienst verdankt und isch uf däm Gebiet sis Lääbe lang däätig gsi. Wo mä 1410 d Stadt nöi in vier Kwardier iidäilt het, isch er Offizier im zwäite Hufe us em Lienerdskiirchespiil gsi, und wo am 11. Juli 1424 d Baasler e Kontingänt gschiggt häi, zum zämme mit de elsässische Riichsstedt iiri Verbündeti, d Herzogin Katharina vo Burgund, gegen e Brinz vo Orange z understütze, isch dr Eberler as Pannerher mitgritte. Er het au am 12. Dezämber 1428 s Stadtpanner ghebt, wo dr Spanier Juan de Merlo und dr Heinrich vo Ramstäi uf em Münsterblatz vor dr Bürgerschaft und de lokale Aadlige iire Zwäikampf abghalte häi.

Liigeschafte[ändere | Quälltäxt bearbeite]

Dr Mathis Eberler het am Aafang vom 15. Joorhundert meereri Liigeschafte an dr Gärbergass bsässe. 1404 het er s Huus «zum Ritter» an dr Gärbergass 44 kauft, wo früener Juude ghöört het und 1408 dr Studershoof an dr Gärbergass 30 grad näbe sim äignige Huus. Es isch am alte Rindermäärt glääge, und im Grundbuech stoot grad «an dem ort nebend der judenschul». Im Mathis si Soon, dr Heinrich, het dr Studershoof denn spööter wider verkauft.

Kwelle[ändere | Quälltäxt bearbeite]