Heinrich vo Ramstäi

Dialäkt: Baseldütsch

Dr Heinrich vo Ramstäi isch e Ritter us dr Baasler Aadligefamilie vo de Ramstäi gsi. Er isch bekannt wägen em Duell, won er gege dr Spanier Don Juan de Merlo usdräit het.

Dr Heinrich vo Ramstäi het in dr erste Helfti vom 15. Joorhundert gläbt. In dr Stadt Baasel het er im Spaalehoof am Spaalebärg gwoont.

Dr Zwäikampf gegen e Juan de Merlo

S Durnier zwüschen em Don Merlo und em Heinrich vo Ramstäi uf em Münsterblatz, wie sich das dr Karl Jauslin vorgstellt het. Dr Ramstäiner weer dä mit em Wabbe mit de krüzte Liliestääb druf.

Dr Juan de Merlo isch dr Soon vom Alfonso de Merlo gsi, em Maestresala vo dr Köönigin Dona Beatriz, Frau vom Köönig Juan I. Won er uf Baasel cho isch, het er ganz grooss aagee und gsäit, ass er uf sine Räise niemer gfunde häig, wo iim häig chönne Widerstand läiste. Das het dr Ramstäi aagsäicht und er het dr Merlo zum Zwäikampf uusegforderet. D Bedingige si gsi, ass jeede e Lanzestich wurd mache, drei Schleeg mit ere Mordaxt und vierzig mit eme Schwärt. Dä Zwäikampf het druf die ganz Stadt beschäfdigt. Dr Markgroof Wilhelm zu Röttele isch dr Ooberkampfrichder gsi, und ghulfe häi em dr Groof Hans vo Thierstäi, dr Thuering Freiher vo Hallwil, dr Rudolf vo Ramstäi und dr Egloff vo Rothsomhuuse us em Elsässische. Dr Mathis Eberler het s Stadtbanner dräit, wien er das scho 1424 gmacht het, wo Baasel Druppe zur Understützig vo dr Katharina vo Burgund gegen e Brinz vo Orange gschiggt het. Vo witem si Aadligi zum Aaloss cho und au d Iiwooner vo Baasel häi welle cho bschaue.

D Obrigkäit het aber nid vergässe, was 1376 an dr Bööse Fasnacht bassiert isch, wo Krawall usbroche si und das dr Stadt düür z stoo cho isch. Dorum si die mäiste Stadtdoor am Daag vom Duell, am 12. Dezämber 1428, zuebliibe und an de offnige het mä Wache ufgstellt. Zwanzig Soldate häi in dr undere Stadt und non emol zwanzig in dr oobere ufbasst und uf em Rhii zwanzig Schiff. Und bi de Dürm und Sturmglogge si no me Bewaffneti baraatgstande.

Dr Kampfring isch uf em Münsterblatz gsi und nääbedraa e Bodium für d Richder. Tout Bâle isch erschiine: dr Bürgermäister Burkhard zu Rhii, d Ritter und d Rööt und alli si bewaffnet gsi, die aadlige Daame us dr Stadt und dr Umgääbig, und jung und alt.

Dr Kampf mit Lanze, Axt und Schwärt isch noch em Codex 5278 unentschiide usgange, noch eme spanische Bricht häig dr Juan de Merlo im brabantische Dorf Bala dr dütsch Ritter Enrique de Remestién im e Zwäikampf besigt.

S Ändi vo de Durnier

S letschte Durnier z Baasel het im Joor 1491 stattgfunde. Die Aadlige häi im 14. Joorhundert mee und mee vo iirem Iifluss verloore und de Bürgerlige si Durnier verbote und sowiso z gföörlig gsi. Si häi sich au drüber lustig gmacht wie mä bim ene Minnekästli us dr Region cha gsee, wo Affe sich bim ene Durnier bekämpfe.

Notize

Dr Cervantes het s Duell vom Juan de Merlo mit em Ramstäi in sim Buech Don Quijote, 1. Band, 49. Kapitel, erwäänt.

Oder villicht wird mä mer verzelle, dass es e faarende Ridder wie dr dapferi Lusitanier Juan de Merlo nid gee häig, wo ins Burgunderland zooge isch und in dr Stadt Arras mit em berüemte Herr vo Charry, wo men em Monseigneur Pierres gsäit het, und denn in dr Stadt Baasel mit em Monseigneur Enrique de Remesten kämpft het, und sich in bäide Dräffe Berüemthäit und Eer erworbe het.

Kwelle

• Johann Jakob Hottinger, Die Schweiz in ihren Ritterburgen und Bergschlössern, 1. Band, Gustav Schwab, Dalp, 1828, S. 265 ff.