Maoismus

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Persoonekult um e Mao isch im Maoismus stark usbrägt, äänlig wie s dr Persoonekult um e Stalin und Lenin in Ostöiropa gsi isch.

S Mao-Zedong-Dänke (veräifachts Chinesisch: 毛泽东思想; dradizionells Chinesisch: 毛澤東思想; pinyin: Máo Zédōng Sīxiǎng), oder Maoismus, isch e politischi Theorii, wo vom chinesische Füerer Mao Zedong (1893–1976) stammt. Iiri Aahänger si as Maoiste bekannt und gseen din en antirewisionistischi Form vom Marxismus-Leninismus. D Ideologii het sich in de 1950er Joor entwigglet und isch die füerendi politischi und milidäärischi Wältaaschauijig vo dr Kommunistische Bardei vo China gsi, bis dr Deng Xiaoping noch em Dood vom Mao 1976 e nöiji Verfassig und wirtschaftligi Reforme iigfüert het und füerendi Maoiste wie im Mao si Witwe het lo verhafde. Dr Sozialismus mit ere chinesische Bräägig het s Mao-Zedong-Dänke z China abglööst. Revoluzionääri Beweegige uf dr ganze Wält häi sich ideologisch uf e Maoismus gstützt und luege die nöiji Linie vo dr Kommunistische Bardei vo China as rewisionistisch aa.

D Theorii vom maoistische Marxismus[ändere | Quälltäxt bearbeite]

Dr wääsentlig Underschiid zwüschen em Maoismus und andere Forme vom Marxismus isch, dass dr Mao z China in de Buure die revoluzionääri Klass gsee het, und weeniger in de Fabrikarbäiter, wo d Masse vom öiropäische Broletariat usgmacht häi.

Wichdigi Bestanddäil vo dr maoistische Ideologii si:

  • d Theorii vo dr sogenannte Nöije Demokratii, wo säit, ass für d Meerhäit vo de Völker dr langi Wääg zum Sozialismus mit ere nazionaale, populääre, demokratische, antiföidale und antiimperialistische Revoluzioon under dr Füerig vo de Kommuniste aafoot,[1]
  • dr Volkschrieg, das häisst dr revoluzionääri Kampf vo dr groosse Meerhäit vom Volk gege d Usbüterklasse und dene iiri staatlige Iirichdige. Wil die politischi Macht us eme Gweerlauf waggst,[2] wärde d Masse vo dr ländlige Bevölkerig mobilisiert für e bewaffneti Guerillachrieg und d Stedt wärde vom Land us iigschnüert.
  • d Theorii vo dr Masselinie, wo im Gegesatz zum leninistische Vorhuetmodäll säit, ass d Bardei nid vom Volk döf drennt wärde. Für dass e Revoluzioon Erfolg häig, isch das, wo d Masse bruuche und verlange, s wichdigste.[3]
  • d Theorii vo de Kulturrevoluzioon, wo säit, ass die proletarischi Revoluzioon und d Diktatuur vom Proletariat die burschuasi Ideologii und dr Dradizionalismus nid wurd uslösche und ass dr Klassekampf müess witergoo bis iiri soziale Wurzle usgrisse sige.
  • s Konzept vo de Widersprüch, won e wichdige Däil von ere Gsellschaft si. Nume mit dr Revoluzioon chönni Widersprüch wie dä zwüsche dr Aarbet und em Kapitaal glööst wärde. Wil Widersprüch au innerhalb vo dr revoluzionääre Beweegig entstöön, muess mä sä mit ere ideologische Korrektur uflööse, bevor si zerstöörerisch wärde.
  • d Drei-Wälte-Theorii, wo säit, ass im Chalte Chrieg zwäi imperialistischi Staate, d Sowjetunion und die Veräinigte Staate die Ersti Wält bildet häi, die andere imperialistische Staate die Zwäiti Wält und die nid-imperialistische Staate die Dritti Wält, wo vo dr Erste und Zwäite Wält usbütet wird. D Proletarier in dr Erste und Zwäite Wält si «kauft» worde und nid an ere sozialistische Revoluzioon intressiert. Die cha doorum nume no vo de Länder vo dr Dritte Wält cho.[4]

Litratuur[ändere | Quälltäxt bearbeite]

  • Henning Böke: Maoismus, Schmetterling Verlag, Stuttgart 2007.
  • Ingo Schäfer: Mao Tse-tung. Eine Einführung in sein Denken. C. H. Beck, Münche 1978. ISBN 3-406-06784-0.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Amin, Samir. The Countries of the South Must Take Their Own Independent Initiatives , The Third World Forum, October 2009. Abgruefen am 22. Februar 2011. 
  2. Quotations From Chairman Mao
  3. Steiner, Arthur H., "Current 'Mass Line' Tactics in Communist China", The American Political Science Review, Vol. 45, No. 2 (Jun., 1951), pp. 422-436
  4. Maoism Glossary of Terms, Encyclopedia of Marxism
Information icon.svg Dä Artikel basiert uff ere fräie Übersetzig vum Artikel „Maoism“ vu de änglische Wikipedia.

E Liste vu de Autore un Versione isch do z finde.