Marxismus-Leninismus

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D „Schöpfer“ vom Marxismus-Leninismus: Dr Marx, dr Engels, dr Lenin und dr Stalin (Demonstrazioon am 1. Mai 1953 in Ost-Berlin)

Dr Begriff Marxismus-Leninismus bezäichnet die offizielli politischi Ideologii vo dr Sowjetunion vo dr Middi vo de 1920er-Joor aa. Dr Josef Stalin het en definiert as „d Leer vom Marx, wo dr Lenin under de nöije Verheltniss vom Klassekampf in dr Epoche vom Imperialismus und vo de proletarische Revoluzioone“ witerentwigglet het.[1]

Definizioone[ändere | Quälltäxt bearbeite]

Noch em Dood vom Lenin im Joor 1924 isch dr Marxismus-Leninismus zur offizielle Staatsdoktrin vo dr Sowjetunion worde. Er het as e wüsseschaftligi Wältaaschaujig vo dr Arbäiterklass gulte. Ursprünglig isch nume d Bezäichnig Leninismus im Bruuch gsi, spööter isch s Begriffsbäärli Marxismus-Leninismus in erster Linie vo de kommunistische Bardeie verwändet worde, zum sich vom Trotzkismus und andere Grubbe, wo gegen e Stalinismus gsi si, und au vom Reformismus und Revisionismus vo dr Sozialdemokratii abzgränze.

Mit dr Verbindig vo de bäide Begriff het mä au dr äigeständig theoretisch und braktisch Verdienst vom Lenin bi dr Witerentwigglig vom Marxismus welle würdige. D SED het sich uf e Stalin gstützt, wo di dr Marxismus-Leninismus as…[2]

„… die von Marx und Engels begründete und von Lenin weiterentwickelte wissenschaftliche Weltanschauung der Arbeiterklasse, die von der internationalen kommunistischen Bewegung auf der Grundlage der Erfahrungen des sozialistischen und kommunistischen Aufbaus und der Praxis des revolutionären Befreiungskampfes ständig bereichert wird.“

definiert het.

Au noch dr offizielle Stalin-Kritik uf em XX. Bardeidaag vo dr KPdSU isch dr Begriff Marxismus-Leninismus vo de kommunistische und sozialistische Bardeije, wo iine noochgstande si, witer verwändet worde.

Lut em Lenin[3] het dr Marxismus-Leninismus drei Hauptbestanddäil:

  • Dr dialektisch und dr historisch Materialismus (abkürzt DIAMAT und HISTOMAT) bilde die filosofischi Grundlaag vom Marxismus-Leninismus. Si wärde as e braktischi Aaläitig gsee zum dr Sozialismus oder Kommunismus ufzbaue.
  • Die politischi Ökonomii undersuecht d Beziejige vo de Mensche in dr Brodukzioon und dr Gsellschaft. Dr Marx sälber het immer von ere Kritik vo dr politische Ökonomii gschwätzt.
  • Dr wüsseschaftligi Sozialismus oder wüsseschaftligi Kommunismus (im Geegesatz zur Sozialdemokratii) wird as d „Wüsseschaft vom Klassekampf vom Broletariat und vom Ufbau vo dr sozialistische und kommunistische Gsellschaft“ definiert.[2] Bim Stalin isch no vo dr „Leer vom Klassekampf und Sozialismus“ d Reed gsi.[1]

In dr DDR isch dr Marxismus-Leninismus an alle Uniwersidääte, Hoochschuele und Fachschuele e Pflichtkurs gsi. Studänte us alle Fachrichdige häi an Leerveraastaltige in Marxismus-Leninismus (ML) nüesse mitmache und Brüefige müess ableege. Au d Brofässer, Dozänte und wüsseschaftlige Mitarbäiter höi die ganz Zit Kürs in ML müesse nee. Für daas het s an jedere Hoochschuel und Uniwersidäät en Instidut für Marxismus-Leninismus und an de Fachschuele entsprächendi Sekzioone gee.

Litratuur[ändere | Quälltäxt bearbeite]

  • Leo Trotzki: Bolschewismus und Stalinismus. 1937 (Onläin-Wersion).
  • Heinz Laufer: Grundrechte und Marxismus-Leninismus. In: Informationen zur politischen Bildung, Heft 239 (Onläin-Wersion).

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. 1,0 1,1 Lexikon A-Z in zwei Bänden. Band 2, Volkseigener Verlag Enzyklopädie Leipzig 1957, S. 114
  2. 2,0 2,1 Meyers Universallexikon. Band 3, VEB Bibliographisches Institut Leipzig 1979, 1. Uflaag, S. 81
  3. Lenin: Drei Quellen und drei Bestandteile des Marxismus. In: Proswenschtschenije Nr. 3, Merz 1913. Lenin Werke, Bd. 19, S. 3–9 (Online-Version; geprüft am 14. Mai 2008).