Lichdaschdõẽ

Us der alemannische Wikipedia, der freie Dialäkt-Enzyklopedy


Wappa Deitschlandkart
Wappa vo de Gmoed Lichtenstein (Württemberg)
Lichtenstein (Württemberg)
Deutschlandkarte, Position vo de Gmoed Lichtenstein (Württemberg) hervorghobe
Koordinate: 48° 26′ N, 9° 15′ O
Basisdata
Bundesland: Bade-Wirttebärg
Regierongsbezirk: Dibenga
Landkroes: Reitlenga
Heh: 507 m i. NHN
Fläch: 34,2 km²
Eiwohner:

9194 (31. Dez. 2021)[1]

Bevelkerongsdicht: 269 Eiwohner je km²
Boschtloetzahl: 72805
Vorwahl: 07129
Kfz-Kennzoeche: RT
Gmoedsschlissel: 08 4 15 092
Adress vo dr
Gmoedsverwaltong:
Rathausplatz 17
72805 Lichtenstein
Webpräsenz: www.gemeinde-lichtenstein.de
Schuldes: Peter Nußbaum
Lag vo de Gmoed Lichtenstein (Württemberg) em Landkroes Reitlenga
KarteAlb-Donau-KreisLandkreis BiberachLandkreis BöblingenLandkreis EsslingenLandkreis EsslingenLandkreis GöppingenLandkreis SigmaringenLandkreis TübingenZollernalbkreisBad UrachDettingen an der ErmsEngstingenEningen unter AchalmGomadingenGrabenstettenGrafenberg (Landkreis Reutlingen)Gutsbezirk MünsingenHayingenHohenstein (Landkreis Reutlingen)HülbenLichtenstein (Württemberg)MehrstettenMetzingenMünsingen (Württemberg)PfronstettenPfullingenPfullingenPliezhausenReutlingenRiederichRömerstein (Gemeinde)SonnenbühlSt. Johann (Württemberg)TrochtelfingenWalddorfhäslachWannweilZwiefalten
Karte
Dialäkt: Zendralschwäbisch

Lichdaschdoe (dt. Lichtenstein) isch a Gmaende em Landkreis Reidleng en Bada-Wirddabärg. D Gmaende hådd 9194 Aewohner (Stand: 31. Dezember 2021). Endsdanda isch dui Gmaende durch d bada-wirddabärgische Gmaendereform zomm 1. Januar 1975. Zo ir ghaered viir Flägga: Ondorhausa (Unterhausen), må s Rådhaus isch; Oborhausa (Oberhausen), seid 1934 schao zo Ondorhausa gheerich; Holzlfenga (Holzelfingen) ond Honao (Honau). Dui nuia Gmaende hådd irn haedicha Nãma nåch-m Schlessle Lichdasdoe griagd, dees må haoch ibor ire Flägga em Echazdaa leid ond en ganz Wirddabärg bekannd isch. Lichdaschdoe ghaerd zo koem Verwaldongsvorband.

Geografi[ändere | Quälltäxt bearbeite]

Bligg vom Schloss Lichdasdoe nåch Norda ens Echazdaal, mit Honao (vårna) ond Ondorhausa (henda)

Lichdasdoe leid om obora Echzatal, ogfär 10 km sidlich vo Reidleng. Drei vo saene viir Flägga: Ondorhausa, Oborhausa ond Honao liiged em Echazdaal. Dor Flägga Holzlfenga leid esdlich dorvo oborhalb vom-ma Seidadaal scho uff dor Albhochfleche. Hendor Honao haerd s Daal uff, ond rondrom gåd-s ibor 200m sdeil uff d Schwäbischa Alb nuff.

D Gmarkong sezzd sich zsēma aus 36,7 % Landwirdschafdsfleche, 49,6 % Wald, 12,5 % Siidlongsfleche ond 1,1 % sonschdicher Fleche.[2]

Vo Reidleng här kommd d B312 s Echazdaal ruff, gradwäags durch älle drei Flägga em Daal durch. Hendor Honao gåd-se en mährore Kehra sdeil uff d Schwäbischa Alb nuff. D sogenannda "Honaor Sdåeg" isch em Wendor bei Schnae oft gfärlich ond a Nådlehr firr dor Vorkehr.

Aus dor Gschiichd[ändere | Quälltäxt bearbeite]

S aersde Mål wird ǎnna 1220 dor Flägga Holzlfeng erweend, als Holtelvingen. 1355 isch dees, was haed Lichdasdoe isch, zo Wirddabärg komma ond hådd so spädor d Reformaziõ midgmachd.

Nåch-m Zwåeda Wäldgriag isch s Echazdaal emmer sdergor besiidled wårda, sodass haed dia drei Flägga emm Echazdaal (Ondorhausa, Oborhausa, Honao) baulich ennanandor iborganged. En Lichdasdoe geid-s viile middlsdendische Firmena, ond d Gmaende hådd a haocha Finanzkrafd. Auswirka duad sich ao, dass d Graessdadd Reidleng midd iror sdarda Indusdri grad blos 10 km weid wägg isch.

En de 1840er Jår isch uff-ma sdeila Felsa ibor-m Echazdaal s Schloss Lichdaschdoe baud wårda, em Ufffdrag vom Gråfa Wilhelm vo Wirddebärg. S Schloss isch s oenziche en ganz Deidschland, dees må uffgrond vom-ma Roman baud wårda isch, nåch-m Roman Lichtenstein vom Wilhelm Hauff. Sae hochromantischor Roman isch dåmåls iboraus populär gwäa, weid ibor Wirddabärg naus. Vårrhär isch uff demm Felsa blos a alda Jagdhidde gsdanda. S Schloss Lichadsdoe isch bis haed vo Tourisda vool, emm Sommor jedes Wochaende vo viile daused Leid.

Bligg nåch Siida uff dor Daalschluss vom Echazdaal mit Honao. En dor Bildmidde henda siid-mor em Wald noo dor Wäag vo dor ehemalicha Zāradbāsdregge uff d Alb nuff

Ondor wirddabärgische Eisabã-Fäns hådd ehemalicha Zãradbã Honao-Lichdasdoe on klangvoola Nãma. Eldore Leid griaged bis haed noo feichde Aoga, wenn-se vo dära vorzeeled. Vo Reidleng isch d Eisabã znäggsd s Echazdaal ruff nåch Honao baud wårda, ond nå bis 1893 dor weidore Dåel Honao–Gloeengsdenga-Mensenga, midd Zåsdanga vo Honao ã, onda emm Daal, bis nuff zor Haldesdell Lichdasdoe uff dor Albhaochfleche. 1969 isch d Bãsdregge vo Honao bis Glaeengsdenga sdillglegt ond aabaud wårda.

Verwaldong[ändere | Quälltäxt bearbeite]

Dor Schuldess isch dor Peter Nußbaum.

Wahla[ändere | Quälltäxt bearbeite]

Ergäbnis vo de Landdagswahla seid 2006:[3]

Johr CDU SPD FDP Greane Lenke1 AfD Sonschtiche
2016 29,6 % 11,5 % 9,4 % 27,5 % 2,1 % 17,4 % 2,5 %
2011 44,1 % 23,5 % 7 % 18,2 % 2,3 % 4,9 %
2006 49,1 % 22,4 % 10,5 % 9,6 % 2,8 % 5,5 %

1 2006: WASG, seid 2011: Die Linke

Dialekt[ändere | Quälltäxt bearbeite]

Dor Dialäggd vo Lichdaschdoe ghaert zom Zendralschwäbischa.

Leid[ändere | Quälltäxt bearbeite]

Fuaßnote[ändere | Quälltäxt bearbeite]

  1. Statistisches Landesamt Baden-Württemberg – Bevölkerung nach Nationalität und Geschlecht am 31. Dezember 2021 (CSV-Datei).
  2. Statistisches Bundesamt: Bodenfläche nach Art der tatsächlichen Nutzung - Stichtag 31.12. - regionale Tiefe: Gemeinden, Samt-/Verbandsgemeinden (bis 2011)
  3. Statistisches Landesamt Baden-Württemberg: Landtagswahl (Memento vom 7. Juli 2019 im Internet Archive)

Weblink[ändere | Quälltäxt bearbeite]

 Commons: Lichtenstein (Württemberg) – Sammlig vo Multimediadateie