Katja Mast
| Dialäkt: Undermarkgreflerisch |
D Katja Mast (* 4. Februar 1971 z Offeburg) isch e dytschi Bolitikeri (SPD). Si isch syter 2005 Mitgliid vum Dytsche Bundesdaag un syt 2025 Barlemäntaarischi Staatssekreteeri bi dr Bundesminischteri fiür Aarbet un Soziaals. Vu 2021 bis 2025 isch si Eerschti Barlemäntaarischi Gschäftsfieri vu dr SPD-Bundesdaagsfrakzioon gsii.
D Mast isch vu 2011 bis 2016 Generaalsekreteeri vu dr SPD Baade-Wiirtebäärg un vu 2014 bis 2018 Vorsitzeri vu dr SPD-Landesgruppe Baade-Wiirtebäärg im Bundesdaag gsii. Vu 2017 bis 2021 Dezämber isch si stellverdrättendi Frakzioonsvoorsitzeri gsii.
Uuusbildig un Beruef
[ändere | Quälltäxt bearbeite]Noch em Abituur 1990 am Wiirtschaftsgimnasium z Offeburg het d Katja Mast bis 1992 Bankchauffrau bi dr Sparkasse Offeburg gleert. Derno het si an dr Universiteet Haidelberch Biology, Bolitology, Geografy un Pedagogik studiert. Anne 1999 het si s eerscht Staatsexaame fir s Leeramt an Gimnasie abglait.
Vu 1999 bis 2003 het d Katja Mast as Projäktlaiteri in dr Berootigsfirma Institut für Organisationskommunikation GmbH gschafft.[1][2] Vu 2003 bis 2005 isch si Referänti bim Personaalvoorstand vu dr Dytsche Baan AG gsii.
Bolitik
[ändere | Quälltäxt bearbeite]D Katja Mast het si scho syter anne 1990 fir d SPD engaschiert ghaa un isch anne 1993 schließli in d Bartei yydrätte. Vu 1993 bis 1996 het si em Juso-Landesvoorstand z Baade-Wiirtebäärg aagheert. Si isch u. a. Juso-Voorsitzeri z Offeburg un stellverdrättendi Landesvoorsitzeri vu dr Jusos Baade-Wiirtebäärg gsii. In dr Joor 1992, 2009, 2010, 2012 un 2017 isch si Mitgliid vu dr Bundesversammlig gsii, derzue si Deligierti uf SPD-Barteidääg gsii, langjeerig Mitgliid vu dr Aadraagskummission vu dr SPD Baade-Wiirtebäärg un stellverdrättendi Chraisvoorsitzeri vu dr SPD im Enzkchrais.
Im Oktoober 2005 isch d Katja Mast zum eerschte Mool in Bundesdaag gweelt woore. Si duet syterhäär dr Waalchrais Pforze verdrätte, wu näbe Pforze au dr Enzchrais derzuegheert. Si isch all Mool iber d Landeslischt yyzooge. Vu 2005 bis 2013 het si as stellverdrättendi Sprächeri vu dr SPD-Landesgruppe Baade-Wiirtebäärg amtiert, ab 2009 au as stellverdrättendi Sprächeri fir Aarbet un Soziaal vu ire Frakzioon. Im Oktoober 2011 isch si uf em Landesbarteidaag vu dr SPD Baade-Wiirtebäärg zur Generaalsekreteeri gweelt woore. Bi dr Bundesdaagswaal 2013 het si zäme mit em Gernot Erler s Spitzetandem vu dr SPD Baade-Wiirtebäärg gstellt un isch derno vu 2014 bis 2018 zur Laiteri vu dr 16-chepfige Landesgruppe in dr Noofolg vum Christian Langes[3] un au zue dr Sprächeri vu dr SPD-Bundesdaagsfrakzioon fir Aarbet un Soziaals ufgruckt.[4]
Fir d Landdaagswaal 2016 het d Mast as Generaalsekreteeri d Waalkampflaitig fir dr SPD-Landesverband ibernuu.[5] No dr staarke Verluscht fir d SPD bi dr Landdaagswaal isch si nimi as Generaalsekreteeri aadrätte, iri Noofolgeri isch d Luisa Boos woore.[6] No dr Bundesdaagswaal 2017 isch d Mast stellverdrättendi Frakzioonsvoorsitzeri un doo zueständig fir Aarbet, Soziaals, Familie, Senioore, Fraue un Juuged.[7] Derzue isch si im Meerz 2018 as Verdrätteri vu dr SPD-Bundesdaagsfrakzioon in Vermittligsuusschuss vum Bundesdaag gweelt woore.[8] Si isch derzue au stellverdrättend Migliid im Huushaltsuusschuss.
Ab em 6. Juni 2018 isch si Mitgliid in dr vu dr Bundesregierig yygsetzte Räntekummission „Verlässlicher Generationenvertrag“ gsii.[9]
Bi dr Bundesdaagswahl 2021 isch si iber Blatz 5 vu dr Landeslischt Baade-Wiirtebäärg wider in Dytsche Bundesdaag gweelt woore.[10] Am 9. Dezämber 2021 isch si zur Eerschte Barlemäntaarische Gschäftsfieri vu ire Frakzioon gweelt woore.
Bi dr Bundesdaagswahl 2025 isch si wiider iber Blatz 5 vu dr Landeslischt Baade-Wiirtebäärg in Dytsche Bundesdaag gweelt woore.[11]
Wu s Kabinett Merz bildet wooren isch, isch si am 6. Mai 2025 zur Barlemäntaarischi Staatssekreteeri bi dr Bundesminischteri fiür Aarbet un Soziaals, Bärbel Bas (SPD), ernännt woore.[12]
Weblink
[ändere | Quälltäxt bearbeite]
- Websyte vu dr Katja Mast
- Biographie beim Deutschen Bundestag
- d Katja Mast im Stadtwiki Pforzheim-Enz
- Katja Mast uf abgeordnetenwatch.de
Fueßnote
[ändere | Quälltäxt bearbeite]- ↑ IFOK GmbH. Institut für Organisationskommunikation | Netzwerk EBD. Abgruefen am 23. Juli 2019 (de-DE).
- ↑ IFOK GmbH. Institut für Organisationskommunikation | Netzwerk EBD. Abgruefen am 23. Juli 2019 (de-DE).
- ↑ Desiree Krebs: LANDESGRUPPE - Die SPD-Landesgruppe Baden-Württemberg. Abgruefen am 4. Dezember 2017.
- ↑ Websyte vu dr SPD-Bundesdaagsfrakzioon
- ↑ Katja Mast wird Wahlkampfleiterin der Südwest-SPD. Focus Online, 9. Mai 2015.
- ↑ Breymaier zur SPD-Landeschefin gewählt. SWR Fernsehen, 22. Oktober 2016.
- ↑ Wahl des Geschäftsführenden Vorstands | SPD-Bundestagsfraktion. In: SPD-Bundestagsfraktion. 4. Dezember 2017 (spdfraktion.de [abgerufen am 4. Dezember 2017]).
- ↑ Neue Aufgabe für Katja Mast im Bundestag - Nachrichten aus Pforzheim bei PZ-news.de | Pforzheimer Zeitung - Pforzheimer Zeitung. (pz-news.de [abgerufen am 22. März 2018]).
- ↑ Mitgliider vu dr Räntekummission. Archiviert vom Original am 27. März 2020; abgruefen am 27. März 2020.
- ↑ Gewählte in Landeslisten der Parteien in Baden-Württemberg - Der Bundeswahlleiter. Abgruefen am 11. November 2021.
- ↑ Gewählte in Landeslisten der Parteien in Baden-Württemberg – Der Bundeswahlleiter. In: www.bundeswahlleiter.de. Abgruefen am 25. März 2025.
- ↑ Katja Mast. Bundesministerium für Arbeit und Soziales, abgruefen am 30. Mai 2025.
 |
Dä Artikel basiert uff ere fräie Übersetzig vu dere Version vum Artikel „Katja_Mast“ vu de dütsche Wikipedia. E Liste vu de Autore un Versione isch do z finde. |