Junkere 37

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Junkere 37 isch es Chällerlokal ar Junkeregass ir Bärner Altschdat gsii, wo vo 1964 bis 1975 über 300 Diskussioonsööbe schdattgfunge hei, wo vom Walter Zürcher gleited worde si. Si gilt as wichdigschde Dräffpunkd vor Schwiizer Nonkonformismus-Bewegig vo de 1960er Jaar. Es Leitwort vo de Deilnämer vor Junkere 37 isch dr Satz gsii: Na nas njema smerti: Gäg üüs isch kès Chrut gwachse (Huzulisch).[1]

Gschichd[ändere | Quälltäxt bearbeite]

Dr Zeno Zürcher isch 1964 ned nume dr Mitgründer vor Junkere 37 gsi, sondern o dr Veranschdalter, Archivaar, Verwalter, Doontechniker u Diskussionsleiter vom Lokal. Zäme mid em Sergius Golowin, mid em Franz Gertsch u mid em Niklaus von Steiger het dr Zürcher scho i de Füfzgerjaar fréii Diskussions–chreise gründet: zersch dr Cherzechréis u när dr Tägel-Leischd. Ersch ab 1964 hei d Zämekümfd ar Junkeregass 37 schdatgfunge. D Öbe si dür monedlechi Biidräg vo de Veraaschdalter sälber finanziert worde. Bis zu irer Uuflöösig 1975 hei ir Junkere 37 über 300 Veraaschdaltige schdatgfunge, wo s schbeziell um bolitischi u gsellschafdlechi Fraage gange n isch, mit Referänte vom Presseschef vom Eidnössische Militärdepartmänt bis zum Redakder vor Ziitschrifd Vorwärts.[1]

Literatur hed o ne wichdigi Rolle gschbiut: dr „Gammlerpoet“ u Nonkonformischd René E. Mueller hed 1964 dr erschdi Junkere 37-Aabe mit Rezitazioone vo éigene Gedichd u Teggschdene eröffned. Midem Sergius Golowin isch d Vouchsdichdig schdarch verdrätte gsii. A ned wenige Veraaschdaltige hed o d Bundesbolizéi i Form vo Fiche schriibende Mitarbeiter déilgnoo. 1965 hei sech d Veraaschdalter u dr Zeno Zürcher für en Aabe mid em Walter Matthias Diggelmann wo über sis Buech Die Hinterlassenschaft verzellt hed, d Forderig vo de Behörde nach emne Huusierpatänt für em Diggelmann sini Redefreiheit müesse gfalle laa.[1]

E Höepunkd isch gsii, wo am 2. Okdober 1966 dr dütschi Filosofiibrofässer Theodor W. Adorno id Junkere 37 choo isch. Vo däm legendäre n Oobe heds léider keni Uufzeichnige meh. Im Februar 1969 isch dr Urban Gwerder, Dichterfürschd u Redakder vor Ziitschrifd Hotcha!, vom Bärner „Hippie-Pabschd“ Hans Stamm u vor Kritische n Untergrundschuel vor Schwiiz (abgchürzd K.U.S.S.) mid emne „Eeredokdertitel uf em Gebiet vor Schwiizer Jugend u sämtleche Untergrundwüsseschafde“ uuszeichned worde.[1]

1975 hed s Diskussionsforum Junkere 37 sini Chällerdüurene zuegmachd.[1]

Nachlass vom Zeno Zürcher[ändere | Quälltäxt bearbeite]

Brakdisch alls vo de no vorhandene Schrifd– u Doondokumänt vor Junkere 37 si im Nachlass vom Zeno Zürcher dinne, wo im Schwiizer Literaturarchiv archiviert isch (wo ne Deil vom Nonkonformismus Archiv Fredi Lerch isch). Gmäss däm Nachlass si folgendi Näme (en Uuswahl) i irgenderer Wiis mit dr Junkere 37 i Verbindig gschdange:[2]

Theodor W. Adorno, Ursula Andress, Guido Bachmann, Peter Bichsel, Mario Cortesi, Kari Dällebach, Rolf Deppeler, Walter Matthias Diggelmann, Friedrich Dürrenmatt, Ernst Eggimann, Alfred Fankhauser, Konrad Farner, Max Frisch, Franz Gertsch, Sergius Golowin, Lukas Hartmann, Polo Hofer, Ahmed Huber, Ruth Im Obersteg Geiser, Sam Jaun, Franz Keller, Kurt Kipfer, Jakob Klaesi, Ruedi Krebs, Markus Kutter, Timothy Leary, Carl Albert Loosli, Bernhard Luginbühl, Kurt Marti, Mani Matter, Joy Matter, Albert Meyer, Frank A. Meyer, René E. Mueller, Paul Nizon, Meret Oppenheim, Hans Raaflaub, Alfred Rasser, Arist Rollier, Klaus Schädelin, Guido Schmezer, Gerhart Schürch, Marcel Schwander, Kurt Schweizer, Jacob Stickelberger, Hans Martin Sutermeister, Harald Szeemann, Jean Tinguely, Reynold Tschäppät, Paul Ignaz Vogel, Erich von Däniken, Niklaus von Steiger, Rudolf von Tavel, Ricco Wassmer, Max Weber, Manfred Wettler und Fritz Widmer.

Weblink[ändere | Quälltäxt bearbeite]

Kwälle[ändere | Quälltäxt bearbeite]

  1. 1,0 1,1 1,2 1,3 1,4 Nachlass Zeno Zürcher (Memento vom 20. Septämber 2011 im Internet Archive). Schwiizerischs Literatuurarchiv, 2011.
  2. Personeregischder im „Nonkonformismus Archiv vom Fredi Lerch.“ Schwiizerischs Literatuurarchiv, 2011.
Information icon.svg Dä Artikel basiert uff ere fräie Übersetzig vum Artikel „Junkere_37“ vu de dütsche Wikipedia. E Liste vu de Autore un Versione isch do z finde.