Julia Philippi
| Dialäkt: Undermarkgreflerisch |
D Julia Philippi (* 18. Novämber 1962 z Naistadt an dr Wyystroß as Julia Beck) isch e dytschi Bolitikeri (CDU), Vu 2018 bis 2021 isch si Mitglid vum Landdag vu Bade-Wirttebärg gsii.
Uusbildig un Beruef
[ändere | Quälltäxt bearbeite]D Philippi het z Homburg Abitur gmacht un derno an dr Universitet Haidelberch Chunschtgschicht, Volkswirtschaft un Romanischtik studiert. Syter anne 1992 fiert si d Galerie Julia Philippi z Dossenheim.[1]
Bolitik
[ändere | Quälltäxt bearbeite]D Philippi isch anne 1998 in d CDU yydrätte. Bi dr Kommunalwahle 2004 isch si in Gmairot vu Dossenheim gwehlt wore un au in Chraisdag vum Rhy-Necker-Chrais. Ab 2008 isch si Stellverdrättendi Burgermaischteri z Dossenheim gsii. Anne 2023 isch si us em Gmairot uusgschide.[2]
Bi dr Landdagswahl 2016 isch si im Wahlkrais Weinheim as Ersatzkandidati fir dr Georg Wacker aadrätte. Wu dr Wacker dr Staatlige Toto-Lotto GmbH Bade-Wirttebärg gwächslet isch,[3] isch si am 1. Jänner 2018 in Landdag vu Bade-Wirttebärg noogruckt.[4] Im Landdag isch si Mitglid im Uusschuss fir Wisseschaft, Forschig un Chunscht un im Petitionsuusschuss gsii.
Bi dr Landdagswahl 2021 isch d Philippi as CDU-Erschtkandidati im Wahlkrais Weinheim aadrätte, isch aber nit gwehlt wore.
Sunschtigs Engaschmänt
[ändere | Quälltäxt bearbeite]- Mitglid im Kuratorium vu dr Landeszentrale für politische Bildung Baden-Württemberg
- Mitglid vu dr Jury „Radiale – Kunst im Kreis“ vum Rhy-Necker-Chrais
- Mitglid vu dr Kummission Chunscht vu dr Gmai Dossenheim
- Mitglid vum Ufsichtsrot vu dr Jugendeinrichtung Stift Sunnisheim gGmbH,
- Vorsitzeri vum Heidelberger Kunstverein e. V.
- 2. Vorsitzeri vu dr Jugendkunstschule Heidelberg/Bergstraße e. V.
- Schatzmaischteri vum Galerieverband Rhy-Necker, Mannem.
Privats
[ändere | Quälltäxt bearbeite]Ihre Großvater vu dr Muetersyte här isch dr Otto Eichenlaub gsii, wu noch em Zweete Wältchrieg Regierigsbresidänt vum Regierigsbezirk Rhyhesse-Pfalz un Mitglid vu dr Berotende Landesversammlig vu Rhyland-Pfalz gsii isch. Ihre Mueter Monika Beck isch Abgordneti vum saarländische Landdag gsii. D Philippi isch ghyrote, het drei Chinder un läbt mit dr Familie z Dossenheim bi Haidelberch.[4]
Weblink
[ändere | Quälltäxt bearbeite]- d Julia Philippi uf abgeordnetenwatch.de
Fueßnote
[ändere | Quälltäxt bearbeite]- ↑ Websyte vu dr Galerie Julia Philippi
- ↑ Vorreiterin Julia Philippi scheidet aus, Rhein-Neckar-Zeitung, 3. Jänner 2023
- ↑ Vom Landtag in die Lotto-Zentrale, Stuttgarter Zeitung, 22. Novämber 2017.
- 1 2 Galeristin Julia Philippi wird Landtagsabgeordnete, Rhein-Neckar-Zeitung, 15. Novämber 2017.