Johannes Gujan

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Johannes Michel Gujan – wo me von em nid weiss, wenn er uf d Wält cho isch (es muess gäge s Ändi vom 16. Joorhundert gsi sy), aber wenigschtens wenn und au wo ass er gstorben isch: am 28. Februar 1680 z Fiderisch – isch e Bündner Pfaarer gsi.

Sini Muetter isch d Anna Michel gsi, das het men usgfunde, wie dr Ferdinand Sprecher prichtet, aber dr Name vom Vatter isch nid sicher, er chönt Johannes Gujan oder Jakob Gujan gheisse ha, uf al Fäll isch d Familie vo Zernez im Engadin gsi.

Dr Johannes Gujan isch nach em Studium vo dr Theology so wie sini beide eltere Brüedere, dr Jakob Michel Gujan, wo öppe anne 1586, und dr Andreas Michel Gujan, wo öppe 1595 uf d Wält cho isch, als Pfäärer is Prättigä cho. Dr Jakob isch 1607 z Saas und spöter im Rhywald Pfaarer worde, und dr Andreas isch sid 1617 z Chüblisch Pfaarer gsi.

Anne 1625 vernimpt me s erschte Mol überhaupt öppis vom Johannes Gujan. Do het er sim eltere Bruder Andreas i dr Gmeind Chüblisch bim Pfarrdienscht ghulfe, vermuetlech no als Vikar. 1628 isch er id d Bündner Sinoode ufgnoo worde und denn het er z Luzäin und z Fiderisch als Pfaarer gwürkt. Uf ere Glogge im Chilchedurm z Luzäin stoot i dr Inschrift sin Name:

“Johan Michael Gujan Diener am Wort allhie 1638”

Vo 1631 bis 1636 het dr Pfaarer Johannes Michel Gujan au no z Sant Antönie dr Chilchedienscht übernoo. Denn isch er dänk nume no für Luzäin zuständig gsi. Anne 1646 het dr Gujan mit de Gmeinde Fiderisch und Luzäin en nöie Vertrag wider uf zää Joor gmacht, wo me drin gseht, was en Pfaarer für Ufgabe gha het: z Predige und s Wort verchünde, s Oobigmool z leite, d Bruutpaar ysägne, die Chrankne psueche und d Lychepredige z ha. Und er isch dr Schuolmeischtr gsi. Dr Johannes Gujan het z Luzäin Schuol ggä, und d Fiderscher händ gmäss däm Vertrag törfe d Chind, wenn s ne basst het, au zu iim uf Luzäin id Schuol lo goo. D Gmeinde zaalet em en Loon und bringe s nötige Pfaarholz, er tarf im Pfaarhuus woone und s Veh uf d Allmänd trybe. D Fiderscher händ em Gujan s Bürgerrächt versproche, wenn er in ires Dorf würd cho woone. Das het er denn es par Joor spöter au gmacht, wie me do dra gseht, ass sini jüngere Chind z Fiderisch im Chilchebuech ufgschribe sind und nümmen i däm vo Luzäin.

Dr Johannes Gujan het d Agnes Götz us em Rhintl ghürootet und mit ere sibe Chind gha: dr Jakob (* 1635), dr Ulrich, d Anna, dr Andreas, d Angela, dr Ambrosius (* 1653) und dr Martin. Dr Andreas het d Usbildig zum Dokter gmacht, er het anne 1663 z Padua s Exaame bestande. Us em Jakob isch au en Pfaarer worde, und dr Ambrosius het grad au dä Pruef gwäält; er isch sid 1680 Pfaarer vo Fiderisch und Jenaz gsi.

Im Chilchebuech vo Fiderisch het dr Pfaarer Johannes Gujan verschideni Sache us dr Zyt ufgschribe, so bim Joor 1649, dass denn s erschte Zyt uf e Chilchedurm cho isch; es heig 300 Gulde koschtet. 1663 het men en zum Bundesdekan gmacht. Am 28. Februar 1680 isch dr Johannes Michel Gujan gstorbe.

Sini Chinder Andreas, Ambrosius, Martin, Anna und Angela händ z Fiderisch e Schuppele Nochkomme gha. Bis i d Middi vom 18. Joorhundert sind im Dorf scho 43 männlechi und 16 wyblechi Gujan gsi, und sider sind si eis vo de alte Bürgergschlächter i dr Gmeind.

Literatur[ändere | Quälltäxt bearbeite]

  • Ferdinand Sprecher: Die Pfarrerfamilie Gujan. In: Bündnerisches Monatsblatt. Zeitschrift für bündnerische Geschichte, Landes- und Volkskunde, 1934, S. 289–304, 321-342.

Weblink[ändere | Quälltäxt bearbeite]

Otto Clavuot: Gujan. In: Historisches Lexikon vo dr Schwiiz.