Jörg Blaurock

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Jörg Blaurock, wo eigentlech Jörg Cajacob gheisse het (* öpe 1492 z Bonaduz im Bündnerland; † 6. September 1529 z Klause im Tirol), isch e katholische Prieschter und denn eine vo de Vätter vo dr Bewegig vo de Däufer gsi.

Disputazioon z Züri wäg de Däufer am 17. Jänner 1525
e Dafele z Zollike erinneret an en Gottesdienscht vom Manz und vom Blaurock.

Härkumft[ändere | Quälltäxt bearbeite]

Dr Jörg Cajakob isch us ere Familie vom Dorf Bonaduz am Hinderrhy cho. Sin Vatter isch dr Luzi Cajakob gsi. Er het z Chur d Latynschuel psuecht und isch im Chloschter Sankt Luzi zum Prieschter usbildet worde. Den het er a dr Uni vo Leipzig studiert und isch z Trin im Bündnerland Vikaar gsi.

d Reformazioon[ändere | Quälltäxt bearbeite]

Öpe im Joor 1524 het er sich der Reformazioonsbewegig agschlosse und het ghürotet. Mit synere Frou isch er uf Züri ggange zum de Ulrich Zwingli go psueche. Lieber als mit em Zwingli het er sech mit de Lüüt troffe, wo en erschte Chreis pildet hend zum d Bible z läse. Dä Chreis isch vom Konrad Grebel und vom Felix Manz gründet worde, wo mit dr Theologii vom Zwingli je lenger je weniger yverstande gsi sind.[1][2]

Wo dr Root vo Züri am 17. Jänner 1525 en öffentlechi Disputazioon gmacht het, zum näbe anderne Sache au d Froog vo dr Daufi z klääre, het sech dr Cajakob a der Diskussioon bedeiliget. Do het er syn Übername übercho, wo öper gfrogt heeig «wär isch das, wo do redt?», und en andere gsäit het «dä doo im blaue Rock,» und derno het men em eifach «dr Blaurock» gseit[3]

d Bewegig vo de Däufer[ändere | Quälltäxt bearbeite]

Vier Dääg noch der Dischputazioon het dr Root vo Züri pschlosse, jedes Chind müess innert acht Daag noch synere Geburt dauft wärde. Do isch amene Träffe mit em Grebel, em Manz und anderne die erschti Däufergmeind gründet worde. E Chronik vo de Däufer prichtet, dr Cajacob heb do derby de Grebel bätte iin z daufe, und so sig s au gschee. Das isch dr Afang gsi vo dr Däuferbwegig und vo dr Gschicht vo de Schwiizer Freichile.

I dr Umgäbig vo Züri het sech d Bewegig rasch usbreitet. Z Witike, z Höngg, z Küsnacht und z Zollike hets Däufer gha. Wo dr Blaurock am 29. Jänner 1525 z Zollike dr Pfarrer het welle absetze, isch er vo dr Zürcher Polizei verhaftet worde, zäme mit em Manz und de andere Däufer. Uf ere zweite Däuferdisputazioon z Züri het dr Blaurock mid em Zwingli dischpediert. Am 25. Merze isch er us dr Stadt usgwise worde. Er isch derno is Büdnerland zrugg ggange, won er au z Chur e Däufergmeind gründet het, wo vom Stadtroot aber grad verbotte worden isch. Dr Blaurock het me ygspeerd. Uf syne Reise zum anderi Däufer z sammle isch dr Blaurock i de nögschte Joor au z Grüenige, wider z Züri, z Bärn, z Appezäll und z Klause im Tirol gfange gnoo worde, und z Klause het me ne zum Tod verurdeilt und hygrichtet.

Literatur[ändere | Quälltäxt bearbeite]

  • Joseph von Beck (hrsg. Johann Loserth): Georg Blaurock und die Anfänge des Anabaptismus in Graubünden und Tirol. 1899.
  • Fritz Jecklin: Jörg Blaurock vom Hause Jacob. Ein Märtyrer der Wiedertäufer. Graubünden 1891.
  • John Allen Moore: Der Starke Jörg. Die Geschichte Jörg Blaurocks, des Täuferführers und Missionars. Kassel 1955.

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. Leonhard von Muralt, Walter Schmid (Hrsg.): Quellen zur Geschichte der Täufer in der Schweiz. Bd. I, Zürich 1974 (2. Auflage), S. 405.
  2. Vgl. Andrea Strübind: Eifriger als Zwingli. Die frühe Täuferbewegung in der Schweiz. Berlin 2003, ISBN 3-428-10653-9, S. 130.
  3. John A. Moore: Der starke Jörg. S. 12.