Iamide

D Iamide (griechisch Ἰαμίδαι Iamidai) sind e mythisches und historisches Gschlecht vo Woorseger und Priester im antike Griechland gsii, bsunders z Olympia. De Stammvatter isch noch de griechische Mythologi de Iamos gsii, e Soo vom Apollon.

D Iamide sind d Woorseger vo Olympia gsii, wo us de Flamme vom Opferfüür d Zuekunft düütet hend. De Iamid Thrasybulos söll as erst us de Inneraie vomene Hund glese haa. Z Sparta isch e Grabmool vo de Iamide zaigt wore.

Aaghöörigi vo de Iamide

Mythischi und saagehaftei Iamide

Zo de mythische und saagehafte Iamide ghört Euamantis, wo de Kresphontes uf Messenie biglaitet hett. Si Noofaar isch de Theoklos gsii, wo de messenischi Fraihaitsheld Aristomenes biroote hett. Demm sii Soo Mantiklos söll denn zäme mitem Gorgos, em Soo vom Aristomenes, d Messenier uf Sizilie gfüert haa. Dai hett de Mantiklos e Tempel för de Herakles gstiftet.

Historisch bizügti Iamide

• Hagesias vo Syrakus, olympische Siiger ane 468 v. Chr. (Pindar Ol. 6)
• Teisamenos, 1. Hälfti 5. Joorhundert v. Chr., Soo vom Antiochos. Er isch vo Elis uf Sparta choo und hett as Woorseger fööf Siig voruusgasait. (Herodot 9.3.3; Pausanias 3.5.6-8)
• Agias, Soo vom Agelochos, Enkel vom Tisamenos, Sparta, Woorseger vom Lysandros. (Paus. 3.11.5)
• Thrasybulos, 3. Jh. v. Chr., Soo von Aineias, Woorseger im arkadische Mantineia. Z Olympia isch er zäme miteme Hund abbildet wore, miteme uufgschlitzte Buuch, so as d Lebere föreluegt. (Paus. 6.2.4f., 8.10.5)

Öbeliferig

• Herodot: Historie 9.33
• Pindar: Olympischi Ode 6.28-72
• Pausanias: Raise z Griecheland: 3.11.5-8, 4.16.1, 6.2.4, 8.10.5

Literatuur

• Fritz Graf: Iamos. In: Der Neue Pauly (DNP). Band 5, Metzler, Stuttgart 1998, ISBN 3-476-01475-4, Sp. 857.