Hermann Guggenbühl

Us der alemannische Wikipedia, der freie Dialäkt-Enzyklopedy

Dr Hermann Guggebüel isch am 31. Merz 1908 z Sanggallen uf d Wält cho und am 7. Oktober 1960 gstorbe. Er isch Architäkt und Stadtplaner gsi.

Er isch von ere Sanggaller Familie cho, und er het z Züri und z Berlin d Architäktur studiert. Derno het er zerscht im Stadtplanigsampt z Fankfurt am Main und denn als Planer z Sanggalle gschaffet und er het au es eigets Architekturbüro gha. Bi de Hüüser, won er zeichnet het, het er wos möglech gsi isch Elimänt vo der modärne Architektur z Amerika übernoo.[1]

Der Guggebüel isch spöter Stadtarchitäkt vo Winterthur worde, won er d Planig vo der Stadtsidlig, wo dozmol gschnäll gwachsen isch, gleitet het. Vo ihm isch au der Plan für s nöie Kwartier, wo sin Name treit, s Guggi. Dört het e Kwartierstrooss der Name Guggenbühl-Strasse, und en anderi heisst Im Guggenbühl.[2] D Fridhofhalle vo Winterthur, wo der Guggebüel ane 1953 entworfe het, zelt hüt zu de guete und schützenswärte Giböid vo der Stadt.

1951 isch dr Hermann Guggebüel Stadtboumeischter vo Sanggalle worde, und 1959 isch er uf Basel, wonn en d Basler Regierig am 24. Juli 1959 zum Stadtplaner gwählt het. Aber scho eis Joor spöter isch er wägen ere schwäre Chranket gstorbe.

Der Sanggaller Architäkt isch Mitgliid vom Bund vo de Schwiizer Architäkte BSA' gsi.

Literatur[ändere | Quälltäxt bearbeite]

  • Otto Glaus: Hermann Guggenbühl. In: Schweizerische Bauzeitung, 78, 1960, S. 818.

Fuessnoote[ändere | Quälltäxt bearbeite]

  1. Simone Herrmann: Das Beste aus allen Welten (Site cha nüme abgrüeft wärde; Suche im Webarchiv)[1] [2] Vorlage:Toter Link/www.ad-magazin.de, 2. Merz 2018
  2. Strassennamen in Winterthur uf winterthur-glossar.ch