Guggi

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
wo s Kwartier Guggi im Stadtpiet vo Winterthur isch

S Guggi isch es Stadtkwartier vo Winterthur.

I der Schriftsprooch und amtlech schribt me der Name Guggenbühl. Das isch uf der einte Syte en alte Schwiizer Fluername, wo öppen im ene Dotze Gmeinde vo der Schwiiz vorchunt, zum Bischpiil au z Oodereff, z Daalhäim, z Amriswil und z Merishuuse. Erklärt wird dr Name uf der Website vom Projäkt ortsnamen.ch; är sig us zwöi Wörter zämegsetzt: us Gugg, wo mit em Luege z tue het, und us büel, wo en Hoger bezeichnet. Es wär also so öppis wie en Uussichtspunkt.[1]

Zum Wort Gugg cha mer vil inträssants bim Schwyzerischen Idiotikon goge nochelääse.[2] Und zum zwäite Wort vom ganz Name, mundartlech früener Bühel, au.[3]

Der Name z Winterthur chunt aber schynts numen uf eme Umwäg vo deet; er sell däm Kwartier gää worde sy wägem Stadtarchitekt vo Winterthur und spötere Sanggaller Stadtboumeischter und Basler Kantonsboumeischter Hermann Guggenbühl (1908–1960), wo nach em Zwöite Wältchrieg der Winterthurer Stadtplaan und d Entwürf für s Boue i de nöie Sidligspiet zeichnet het. Und me cha dänke, ass d Familie vom Stadtplaner ursprünglig vo som enen Oort, wo ebe Guggebüel heisst, cho isch.

S Winterthurer Guggi-Kwartier isch im Stadtchreis 2 Oberi grad näbet Zinzike. Unedra isch s Technorama.

Es isch es Wohnkwartier am Rand vo der Stadtsidlig. Es het es eigets Schuelhuus. Und dört isch d Baadi vo Oberi.

Fuessnoote[ändere | Quälltäxt bearbeite]

  1. Guggebüel
  2. Lueg im Artikel Gugg bim Schwyzerischen Idiotikon online
  3. Artikel Bühel bim Schwyzerischen Idiotikon online