Henman Sevogel

dr Sevogelbrunne uf em Martinskiircheblatz

Dialäkt: Baseldütsch

Dr Henman Sevogel (* vor 1419, gfalle 26. August 1444 in dr Schlacht vo Sankt Jakob an dr Birs) isch e Baasler Rootsher und Hauptmä us em Achtburgergschlächt vo de Sevogel gsi.

Lääbe

Im Henman Sevogel si Familie het sich in e baar Generazioone us ere badische Buurefamilie zun ere Baasler Patrizierfamilie ufgschwunge und si Groossvater isch Her zu Wildestäi gsi. Dr Henman wird 1419 zum erste Mol erwäänt und isch denn no minderjöörig gsi. Vo 1427 aa isch er as Achtburger im Baasler Root gsässe. Er het si soziali Posizioon gsterggt, won er d Margaretha Anna vo Eptige ghürootet het, wo us em iiflussriiche lokale Aadelsgschlächt vo de Eptiger gstammt het.

D Schlacht bi St. Jakob an dr Birs

Dr Henman Sevogel isch hüte no bekannt, wäge sinere Rolle in dr Schlacht vo St. Jakob an dr Birs. Wo am 25. August 1444 die äidgenössische Drubbe vo Liestel us bi dr Birs aachoo si, isch dr Henman Sevogel as Hauptmä vo öbbe 200 Maa us Liestel und em Waldeburgerdaal biinene gsi. Si Ufdraag isch äigetlig nume gsi, Armaniake z verjaage, wo im Baaselbiet marodiert häi. Au d Äidgenosse hätte äigetlig die franzöösischi Hauptarmee nid sötte bekämpfe.

Wo si aber emol am Uufer vo dr Birs gstande si, häi si sich nüme um iiri Befääl kümmeret und si über e Bach üübere. Dr Sevogel het s nid chönne verhindere, ass au sini Baaselbieter mitgange si. Wie und wo er denn gfalle isch, wäiss mä nid. Die zitgenössische Chroniste verzelle nume, ass er umchoo sig. Spööter isch ufchoo, ass er im Kampf zmidzt under sine Manne gfalle sig und denn het mä afo verzelle, ass sini äigene Lüt iin umbrocht häige, wil er sä nid häig welle über d Birs lo goo. Uf jeede Fall isch er nid im Massegraab hinder dr Kiirche vo St. Jakob begraabe worde sondern in dr Stadt sälber.

Eerige

Dr Henman Sevogel läbt im Gedächtnis vo de Baasler witer. Dr Brunne mit em Hellebardiee uf em Martinskiircheblatz isch Sevogelbrunne dauft worde. 1861 het e Strooss si Naame überchoo, 1884 s Schuelhuus an dere Strooss und 1919 au dr Blatz, wo d Sevogelstrooss in en iine chunnt.

Kwelle

• Henman Sevogel uf altbasel.ch, abgrüeft am 12. Septämber 2014

Litratuur

• Karl Vischer-Merian: Henman Sevogel und sein Geschlecht, Benno Schwabe Baasel, 1880