Dr Sevogelbrunne

47.5586567.5884

Dr Sevogelbrunne

Dialäkt: Baseldütsch

Dr Sevogelbrunne isch e Baasler Stadtbrunne uf em Martinskiirchblatz. Dr Brunne stoot uf dr Liste vo de Baasler Kulturgüeter, wo für d Region vo Bedütig si.

Beschriibig

Dr Brunnedroog isch säggseggig und nääben em befindet sich e Sudeldröögli. Uf em Brunnestogg stoot d Figur vom ene früenöizitlige Soldat, wo mit eme Schwärt, eme Dolch, ere Hellebarde und eme Baasler Wabbeschild usgrüstet isch.

Gschicht

E Brunne het s bi dr Martinskiirche scho im spoote Middelalter gee. Mä wäiss, ass es no vor 1349 dört uf em Friidhoof e Brunne gee het, wo sis Wasser vom Münsterbrunnwärk überchoo het, und no im gliiche Joorhundert isch er dur e Brunne uf em Martinskiirchblatz ersetzt worde. Druf het mä dr Martinsbrunne us Kalchstäi grad an d Kapälle vo dr Spinnwätterzumft aabaut, wo 1851 an d Muure vom Garte vom Roothuus versetzt worde isch, wo mä dr Kiircheblatz nöigstaltet het. Uf em nöije Droog stoot d Jooreszaal 1854, aber dr Hellebaardedrääger us em Joor 1546/47, wo bis 1887/88 uf em Kornmäärtbrunne gstande isch, isch erst uf e Martinskiirchblatz khoo, wo mä um d Joorhundertwändi s Roothuus umbaut het.

Sit 1899 gseet also dr Brunne öbben eso us wie hüte, usser dass mä d Brunnefiguur sit denn scho viermol nöi het müesse aamoole.

Dr Naame

D Figur uf em Brunnestogg isch ursprünglig numen e Sümbol gsi, aber s Volk het im Soldat dr Henman Sevogel gsee, wo in dr Schlacht bi St. Jakob an dr Birs 1444 as Hauptmaa vom ene chliine Baasler Kontingänt gfalle isch, und vo do isch dr Naame Sevogelbrunne khoo.

Kwelle

• Der Sevogelbrunnen uf altbasel.ch
• Sevogel-Brunnen uf brunnenfuehrer.ch
• Sevogelbrunnen - Basel, Switzerland uf waymarking.com