Heinz Stauffer

Us der alemannische Wikipedia, der freie Dialäkt-Enzyklopedy

Dr Heinz Stauffer (* 25. Augschte 1942 z Wattewiu; † 6.Merz 2016 z Thun) isch e Schwyzer Bfaarer un Dialäktautor gsii.

Lääbe[ändere | Quälltäxt bearbeite]

Dr Stauffer isch z Wattewiu uf d Wält chuu un au dert ufgwachse. Är het Schriftsetzer glehrt un derno z Münsige as Korrektor bi Fischer Druck gschafft. Är het am Oobegimnasium d Matura noogmcht un derno an dr Universitet Bärn Theology studiert. Anne 1974 het er s Studium abgschlosse. Är isch derno Bfaarer z Gampele un z Aarbärg gsii. Ab 1990 isch er Bfaarer z Asudinge gsii. Noch ere Härzoperation mit Komplikatione het er sy Beruef anne 2000 mieße ufgee. Ab un zue het er aber no Kollege verdrätte.

Wun er emol noch em Motto vu sym Lääbe gfrogt woren isch, het er gsait: «Brugge schlaa».

Dr Stauffer het insgsamt zeh Biecher gschribe, nyyn dervu uf Bärndütsch. Derzue het er Kolumnen un Rezänsione fir d Zytig gschribe un Bydreg fir Anthologie. Är het au gärn gmolt un zaichnet. Dr Stauffer isch Mitglied im „Berner Schriftstellerinnen und Schriftsteller Verein“ (BSV) gsii.

Dr Stauffer isch ghyrote gsii un het mit syre Frau Monique zwee Sihn un e Dochter ghaa. Si hän zäme z Seftigen BE gwohnt. Im Jänner 2016 isch er in s Alters- un Bflääghaim Wattewiu zoge. Im Merz het er e Lungeentzindig iberchuu un isch an dr Folge vun ere im Spital Thun gstorbe.

Biecher[ändere | Quälltäxt bearbeite]

  • Es Käfeli git o warm. bärndütschi Gschichte. Sonnenheimat-Verlag, Bern 2004. ISBN 3-85580-429-X
  • Wienachte sueche. Advänts- u Wienachtsgschichte. Cosmos Verlag, Muri bei Bern 1998. ISBN 3-305-00138-0
  • Itz oder geng. bärndütschi Gschichte. Cosmos Verlag, Muri bei Bern 1995. ISBN 3-305-00137-2
  • Warum seisch nüt? Mundarterzählung. Cosmos Verl., Muri bei Bern 1991. ISBN 3-305-00136-4
  • ... u dr Dechel druuf. Mundartgedicht. Edition Francke im Cosmos Verl., Muri bei Bern 1988. ISBN 3-305-00134-8
  • Leben verlieren – Leben gewinnen. Unterwegs mit Trauernden. Ill. von Pierre Baur. Fischer-Verl., Münsingen-Bern 1987. ISBN 3-85681-170-2
  • Vo nüt chunnt eifach nüt. bärndütschi Gschichte. Edition Francke im Cosmos Verl., Muri-Bern 1985. ISBN 3-305-00133-X
  • We si nid gschtorbe si, de schtärbe si no... es Märlibüechli für Erwachseni. Francke Verl., Bern 1982
  • Zwätschgibele. e Chrüzig vo Värsli u Gschichtli. Francke Verl., Bern 1981
  • Die da obe. bärndütschi Gschichte. Francke Verl., Bern 1979