Hans Peter Mauch

Dr Hans Peter Mauch (* 24. Juni 1956, † 14. September 2014) isch en Schwizer Sozialdiakon und reformierte aargouische Chiucherot gsi.

Dr Hans Peter Mauch het Elektromonteur glehrt und aaschliessend s Theologisch Diakonische Seminar z Aarau bsuecht, wo damaus noch Bibelschuel gheisse het. Im 1982 isch er Sozialdiakon worde, z erscht in de Chiuchegmein Zofige, vo 1986 bis 1997 in de Chiuchegmein Meisterschwande-Fahrwange und vo 1997 bis zu sim Tod z Birr. Dr Mauch het sich bsunders für d Entwicklig und d Aaerkennig vo sim Bruef iigsetzt. Im 1992 het er s Diakonatskapitel vo de Reformierte Landeschiuche Aargou mit gründ und im gliiche Johr het d Aargouer Chiuche, als ersti i de Schwiz, d Ordination vo Sozialdiakon iigfüehrt. Im 1997 het ihn d Aargouer Synode in de Chiucherot, z Exekutivgremium vo de Landeschiuche gwäut. Zerst het ers Dossier «Pädagogisches Handle» gha, wo ganz neui Forme vo Religionsunterricht entwicklet worde sind und spöter isch er für d Diakonie zuständig gsi. Er isch au langi Johr Präsident vo de Diakonatskonferenz vo de Dütschschwizer reformierte Chiuchene gsi. Im Engagement vom Mauch isch es au z verdanke, dass im Aargou d Sozialdiakön de Pfärrer in de Gmeindsleitig gliichgstöut worde sind. Im Ougste 2014 isch de Mauch vo sim Amt als Chiucherot zruckträte, um meh Ziit für sini Familie und sini Chiuchegmein z ha.

Au politisch isch dr Hans Peter Mauch aktiv gsi. Er het zwei Mol für d EVP für de Nationaurot kandidiert.

Am 14. September 2014 isch er uf ere Vespa, uf dere er mit sinere Tochter isch unterwägs gsi, zwüsche Sarmestorf u Oberniesbärg tödlich verunfallt. Dr Hans Peter Mauch isch ghürote gsi und het vier Chind gha.

Weblink

• Nachruf: Zum Tod von alt Kirchenrat Hans Peter Mauch uf de Website vo de Aargouer Chiuche am 16. September 2014
• Aargau: Alt Kirchenrat Hans Peter Mauch stirbt bei Unfall uf ref.ch am 18. September 2014
• «Papa starb in meinen Armen» uf Blick.ch publiziert am 17. September 2014, aktualisiert am 18. September 2014