Guy Morin

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

Dr Guy Morin (* 4. Dezämber 1956) isch en Arzt und Politiker (GPS) us em Schwizer Kanton Basel-Stadt. Sit 2008 isch er Regierigsbresidänt vom Regierigsroot vom Kanton Basel-Stadt. Im Januar 2016 isch usecho, dass dr Guy Morin bi de Regierigsrootswahle am 23. Oktober 2016 nömm kandidiert. [1]

Bruefligi und politischi Laufbaan bis 2004[ändere | Quälltäxt bearbeite]

Dr Morin het vo 1978 bis 1984 e Medizinstudium an dr Universidäät Basel gmacht. Er het sich zum Arzt für allgemäini Medizin FMH in verschiidnige Spiddaal z Basel witerbildet. Vo 1993 bis 2004 het er en äigeni Huusarztpraxis im Santihanskwardier z Basel ghaa. Vo 1996 bis 2004 isch er Bresidänt vo dr HMO-Huusarztveräinigung gsi.

Vo 1984 bis 86 isch er Sekretäär vo dr Schwizerische Sekzioon vo de Ärzt und Ärztinne für soziali Verantwortig und zur Verhüetig vom ene Atomchrieg (PSR/IPPNW) gsi. Sit 1987 isch er Vorstandsmitgliid vo dr PSR/IPPNW. Sit 1988 isch er Mitgliid bi de Ärztinne und Ärzt für Umwältschutz. Vo 1988 bis 2001 isch er Mitgliid vom Groosse Root vom Kanton Basel-Stadt gsi. 1997-2001 isch er dört dr Gsundhäitskommissioon vorgstande.

Dr Regierigsroot 2005 bis 2009[ändere | Quälltäxt bearbeite]

Im Joor 2004 isch er as ersts Mitgliid vo dr Grüene Partei Basel-Stadt in Regierigsroot gweelt worde und isch vo 2005 bis 2009 dr Vorsteher vom kantonale Justizdepartemänt gsi, won er sich stark im Beriich Jugendschutz angaschiert het.

Dr Regierigsbresidänt sit 2009[ändere | Quälltäxt bearbeite]

Im Joor 2008 isch er in stiller Waal dr erst Regierigsbresidänt vom Regierigsroot im Kanton Basel-Stadt worde und het sit 2009 s nöije Bresidialdepartemänt gläitet, wo us de Abdäilige Ussebeziejige und Standortmarketing, Gliichstellig vo Fraue und Manne, Kantons- und Stadtentwicklig, Kultur, em Statistische Amt und us dr Staatskanzlei bestoot.

Dr Guy Morin kandidiert für e wiiteri Legislatur (2013-2017) as Regierigsbresidänt. Am 28. Oktober 2012 finde im Kanton Basel-Stadt d Gsamternöijerigswaale für e Grooss Root und Regierigsroot und dr Regierigsbresidänt wird au gweelt.

S Kulturläitbild vom Kanton Basel-Stadt[ändere | Quälltäxt bearbeite]

Stark beachdet worde isch s Kulturläitbild vom Kanton Basel-Stadt, won er langsiert het und wo d Uuseforderige und Kriterie für staatligi Förderig vom kulturelle Schaffe und die kulturpolitische Ziil und Massnaame ufzellt und e bsundere Akzänt bi dr Vermiddlig vo de kulturelle Aagebot und bi dr Kwalidäätssicherig setzt.

Dr Erwiiterigsbau vom Kunstmuseum Basel[ändere | Quälltäxt bearbeite]

Zur Zit wird am Erwiterigsbau vom Kunstmuseum Basel baut, wo 2016 söll eröffnet wärde. Das wird en Usstelligshuus si, wo s em Kunstmuseum mööglig macht, wäggselndi grossen Sonderustellige z zäige, was für e wältwit füerends Kunstmuseum wääsentlig isch. Gliichzitig chönne dank dr zuesätzlige Usstelligsflechi au d Wärk vo dr Basler Sammlig, wo hervorragend isch, em Publikum wirkigsvoll presentiert wärde.

D Metropolitankomferänz Basel[ändere | Quälltäxt bearbeite]

Au d Gründig vo dr Metropolitankomferänz Basel am 16. Januar 2012 fallt in d Zit vo Vorsitz vom Guy Morin. Wil die politische Struktuure mit dr rüümlige Entwicklig vom Metropolitanruums Basel nit Schritt ghalte hai, cha mä mit dr Metropolitankomferänz Basel d Chreft im Ruum Basel über die dradizionelli politischi Zämmenarbet uuse bündle und die gmäinsame Inträsse vom Metropolitanruum Basel besser verdräte. Die Blattform versammlet Lüt us dr Politik, dr Wirtschaft und dr Zivilgsellschaft under äim Dach.

Weblingg[ändere | Quälltäxt bearbeite]

Fuessnote[ändere | Quälltäxt bearbeite]

  1. Regierungspräsident Guy Morin verzichtet auf erneute Kandiatur – Mediämitteilig. Websiite vom Kanton Basel-Stadt. Abgrüeft am 8. Februar 2016.


Information icon.svg Dä Artikel basiert uff ere fräie Übersetzig vum Artikel „Guy_Morin“ vu de dütsche Wikipedia.

E Liste vu de Autore un Versione isch do z finde.