Christoph Eymann

Dr Christoph Eymann (* 15. Januar 1951 z Basel, Bürger vu Basel) isch e Schwizer Politiker us dr (LPS).

Dr Eymann het vo 1973 bis 1978 Jurisprdänz an dr Uni Basel studiert. Vo 1980 bis 1984 het er as Jurist bim Basler Volkswirtschaftsbund gschafft, 1984 bis 2001 isch er Diräkter vom Gwärbverband Basel-Stadt gsi.

Politisch aktiv isch dr Eymann 1981 worde, won er zum Mitgliid vom Basler Bürgergmäindiroot gweelt worden isch. 1984 bis 1995 isch dr Eymann im Groosse Root vom Kanton Basel-Stadt gsässe. Vo 1991 bis 2001 isch er im Nationalroot gsi. 2000 isch dr Eymann in dr Basler Regierigsroot gweelt worde und 2004 und wider 2008 im Amt bestäätigt worde. Er isch dört dr Vorsteher vom Erzieigsdepartemänt.

In de Nünzäänünzigerjoor het er im äigene Laager ökologischi und gsellschaftspolitischi Ideä duuregsetzt, zum Däil gege groosse Widerstand. Dr Grundsatz vo dr „noochhaltige Entwicklig“ isch noch ere Mozioon von em in die revidierti Bundesverfassig ufgnoo worde.^[1]

Dr Eymann isch gschiide. In dr Armee het er s zum Hauptmä brocht.