Guido vo Spoleto

Guido von Spoleto
	Römische Kaiser, König vo Italie, Herzog vo Spoleto und Camerino
Regierigsziit	König vo Italie: 889-894; Römische Kaiser: 891–894
Titel	Herzog vo Spoleto und Camerino
Gstorbe	Dezember 894
Vorgänger	Herzog vo Spoleto und Camerino: Guido II.; König vo Italie: Berengar I.; Römische Kaiser: Karl III. dr Dick
Nochfolger	Herzog vo Spoleto und Camerino: Guido IV.; König vo Italie: Lambert vo Spoleto; Römische Kaiser: Lambert vo Spoleto
Verhürotet mit	Angiltrude

Dr Guido III. vo Spoleto (eigentlig Wido bzw. Wido III.; † Dezember 894) isch s wichtigste Mitgliid vo dr Familie vo de Guidone gsi, wo in dr zweite Helfti vom 9. Johrhundert im langobardische Herzogtum Spoleto in Mittelitalie gherrscht hai.

Läbe

Dr Guido isch dr Sohn vom Markgraf Wido I. vo Spoleto und siiner Frau Itana, vermuetlig e Dochter vom Herzog Sico vo Benevent, gsi. Er isch vo 876 aa Herzog vo Camerino gsi, em östlige Deil vom Herzogtum Spoleto, wo vo siim Vater Wido I. under siine Söhn ufdeilt worden isch. Er het s Herzogdum 883 wider vereinigt. Für zum Hilf gege d Sarazene überzcho, het er sich an Byzanz gwändet. Druf het en dr Kaiser Karl III. 883 wäge Hochverrot agchlagt und het en gfangegnoh. Dr Guido het aber chönne flüchte und het für churzi Ziit e Bündnis mit de Sarazene abgschlosse. 885 het en e Riichsversammlig vom Vorwurf vom Hochverrot freigsproche. Dr Guido isch zu säller Ziit dr mächtigst Fürst z Italie gsi. Dr Papst Stephan V. het en noch siiner Wahl 885 um Hilf bittet, wo dr Kaiser Karl III. ihn nit gege d Sarazene het welle understütze, wil me nit mit em d Papstwahl abgmacht gha het. Für zum s neue Bündnis z sterke, het dr Stephan dr Guido adoptiert. Dr Herzog het druf d Sarazene am Garigliano gschlage und Capua und Benevent eroberet.

Noch em Karl siim Dod 888 isch dr Guido noch Burgund zoge und het sich z Langres zum Karl siim Nochfolger as westfränkische König lo chröne. Er het sich aber vor em Odo vo Paris, wo z Compiègne gwehlt worden isch, müesse zruggzieh. Zrugg in Italie isch er gege dr Berengar I. zoge, wo sich zum italiänische König het lo chröne. Er het en 889 an dr Trebia gschlage. Denn het sich dr Guido, wo vor allem vo de oberitaliänische Bischöf understützt worden isch, z Pavia zum König vo Italie lo chröne. 891 het er dr Papst Stephan V. zwunge, ihn zum Kaiser z chröne. Im Johr 892 het er s fertig brocht, ass dr Papst Formosus si Sohn Lambert zum Mitkaiser gchrönt het. Er isch im Dezämber 894 gstorbe, nochdäm dr Arnulf vo Kärnte, wo dr Formosus uf Italie grüeft het, Norditalie bsetzt het.

Si Sohn Lambert het d Chrone an Arnulf verlore, wo dä uf eme neue Fäldzug uf Italie cho isch. Dr Lambert isch 898 gstorbe.

Hürote und Chinder

Mit siiner Frau Angiltrude, wo 894 no gläbt het, het er u. a. e Sohn gha:

Lambert († 15. Oktober 898 z Marengo), Herzog vo Spoleto, (Mit-)Kaiser Februar 892

Weblingg

genealogie-mittelalter.de

Vorgänger	Amt	Nochfolger
Guido II.	Herzog vo Spoleto und Camerino 882–889	Guido IV.
Berengar I.	König vo Italie 889–894	Lambert vo Spoleto
Karl III. dr Dick	Römische Kaiser 891–894

Dä Artikel basiert uff ere fräie Übersetzig vum Artikel „Guido_von_Spoleto“ vu de dütsche Wikipedia. E Liste vu de Autore un Versione isch do z finde.