Formosus

Jean Paul Laurens: «Le Pape Formose et Etienne VII» (1870)

Dr Formosus (* ca. 816; † 4. April 896 z Rom) isch zwische 891 un 896 Papscht gsii.

Läbe un Wirke

Dr Formosus isch 75 Johr alt gsii, wun er gwehlt woren isch. Vorhär isch er Bischof vu Porto gsii. Anne 864 isch er Legat bi dr Bulgare wore un het noch em Wille vum Khan Boris dr erscht Metropolit vu Bulgarie sotte gee. Chilcherächtli het si d Yyrichtig vum Metropolitat aber nit dursetze loo. In dr Johr derno het er e baar Mol diplomatischi Missione fir d Päpscht ibernuu. Anne 875 het er mit em Karl em Chahle iber däm syni Chaiserchrenig verhandlet. E Johr speter het em dr Papscht Johannes VIII. sy Bischofsamt entzoge, wel er bi re Verschwerig het solle mitgmacht haa. Dr Marinus I. het en derno e baar Johr speter wider yygsetzt un är isch wider päpschtlige Beroter gsii.

Am 6. Oktober 891 isch dr Formosus ohni greßeri Wahlussenandersetzige Papscht wore. Är het wohl gege sy Wille d Chaiserchrenig vum Guido vu Spoleto widerholt un het däm sy Suhn, dr Grof Lambert vu Spoleto zum Mitchaiser gchrent. Die sin aber bal eso mächtig wore, ass dr Formosus dr dytsch Chenig Arnulf vu Kärnte z Hilf gruefe het. Dää het Rom eroberet un isch anne 896 sälber Chaiser wore. Derzue isch dr Formosus in Stryt grote mit em remische Stadtadel.

Dr Formosus isch am 4. April 896 gstorbe. No dr churze Amtszyt vum Bonifatius VI. het dr Spoleto-fryndli Stephan VI. im Jänner 897 iber d Lyych vum Formosus Gricht ghalte (Lyychesynod) wäge syre aageblige Usurpation vum Papschtdroon. Dr Lyych sin d Schwurfinger amputiert un di isch in dr Tiber gheit wore. No im nämlige Johr anne 897 het em Stephan sy Noofolger Theodor II. d Bschliss vu dr Lyychesynod wider ufghobe un d Lyych vum Formosus, wu vu Aahänger vu sällem us em Tiber uusegholt woren isch, wider in dr Krypta vum Petersdom begrabe loo. Unter em Papscht Sergius III., eme entschidene Aahänger vum Stephan VI., isch d Bartei vum Formosus wider verfolgt wore. Är het d Lyych vum Formosus no zeh Johr im Grab e zwait Mol exhumiere, enthaupte, di räschtlige drei Finger vu dr Schwurhand abhaue un si derno wider in dr Tiber gheie loo. Di chopflos Lyych het si in eme Garn vun eme Fischer verfange un isch in dr Petersdom zruckbrocht un dert wider bstattet wore.

Literatur

• Friedrich Wilhelm Bautz: Formosus. In: Biographisch-Bibliographisches Kirchenlexikon (BBKL). Band 2, Hamm 1990, ISBN 3-88309-032-8, Sp. 70–71.
• Marie-Luise Heckmann: Der Fall Formosus – ungerechtfertigte Anklage gegen einen Toten, Leichenfrevel oder inszenierte Entheiligung des Sakralen?, in: Stefan Weinfurter (Hrsg.): Päpstliche Herrschaft im Mittelalter. Funktionsweisen, Strategien, Darstellungsformen. (= Mittelalter-Forschungen 38). Ostfildern 2012, S. 223-238
• Ytrag in d Catholic Encyclopedia, Robert Appleton Company, New York 1913 (änglisch)

Weblink

 Commons: Formosus – Sammlig vo Multimediadateie

Vorgänger Stephan V.

Papscht 891–896

Nochfolger Bonifatius VI.

Dä Artikel basiert uff ere fräie Übersetzig vu dere Version vum Artikel „Formosus“ vu de dütsche Wikipedia. E Liste vu de Autore un Versione isch do z finde.