Markgrof

Dialäkt: Undermarkgreflerisch

Dr Markgrof (Lat. marchio oder marchisus) isch dr Titel fir Grof as cheniglige bzw. chaiserlige Amtsdreger, wu ne Gränzmarch zum Läche gha het, also ne Biet, wu diräkt an dr Ryychsgränze vum Fränkische Ryych bzw. em Oschtfrankeryych gläge un zur Verteidigung vu däre Gränze yygrichtet woren isch. Fir dr Markgrof isch au dr Titel Gränzgrof (Comes terminalis) gängig gsi.

Im Heilige Remische Ryych sin d Markgrofe Aagherigi vum Ryychsfirschtestand un dodermit dr Herzeg faktisch glyychgstellt gsi.

D Markgrofe im Friemittelalter

S Amt vum Markgrof isch vum Chaiser Karl em Große um 800 yygfiert un vu syyne Noofolger langi Zyt byybhalte wore. Em Karl syy Ziil isch es gsi, d Gränze vum Ryych gege Aagriff vu usse z sichere.

Ass si ihri risikoryych Ufgab hän chenne erfille, hän d Markgrofe Gränzbiet as diräkt Läche vum Chenig bzw. vum Chaiser iberchuu. D Markgrofe hän gegeniber dr normale Grofe bsunderi Rächt. Zem Byschpel hän si dr Heerbann un di hoch Grichtsbarkeit gha. Si hän au chenne Bfeschtigunge aaordne un hän doderzue e greßeri Aazahl vu fränkische Vasalle as Unterstitzig zuegwise kriegt. Die Vollmachte hän ene as Befählshaber vu wichtige Gränzmarche e groß Sälbständigkeit gee, wu däre vu dr Stammesherzeg glyych gsi isch. Wehrhafti Buure sin im ganze Frankeryych fir d Aasidlig in dr Marche aagworbe wore. D Markgrofe hän di Hoch Grichtsbarkeit uusgiebt, ohni ass si ihne zerscht vum Chenig het mieße iberdrait wäre, also ohni Chenigsbann.

Fueßnotte

Dä Artikel basiert uff ere fräie Übersetzig vum Artikel „Markgraf“ vu de dütsche Wikipedia. E Liste vu de Autore un Versione isch do z finde.