Gerhard Götz (Räbböufachmann)

Dialäkt: Markgreflerisch (Obfige)

Dr Gerhard Götz (* 5. Juni 1931 z Flei; † 3. Juli 2024) isch e dytsche Räbböu- un Obstböufachmann gsii. Im Räbböubiet Wirttebärg het er as Gschäftsfierer vum Räbböuverband un Diräkter vu dr eltschte Räbböufachschuel vu Dytschland iber Johrzeht e große Yyfluss ghaa un het bi vyl Neiem mitgmacht.

Lääbe

Dr Götz isch as eltscht Suhn vum Buur Alfred Götz un däm syre Frau Emma, geb. Lang, z Flei uf d Wält chuu un isch dert vu 1938 bis 1942 uf d Volksschuel gange. Ab em Spotjohr 1942 isch er Schueler uf dr Robert-Mayer-Oberschuel in dr Nochberstadt Haalbrunn gsii. Nodäm dr Unterricht wäg em Chrieg ab Dezember 1944 uusgfallen isch, isch er ab ab Juni 1945 u di Verainigte Oberschuele vu Halbrunngange un het im Juni 1951 am Theodor-Heuss-Gimnasium z Haalbrunn s Abitur gmacht. Deerno het Buur gleert un isch in dr Winter 1951/52 un 1952/53 uf d Buureschuel Haalbrunn gange, im Friejahr 1953 et er d Leer mit dr landwirtschaftlige Ghilfebriefig abgschlosse.

Ab em Wintersemeschter 1953/54 het er Landwirtschaft an dr Landwirtschaftlge Hochschuel Hohhaim z Stuegert studiert. Anne 1956 het er d Briefig zum Diplomlandwirt mit em Thema Rebenumlegung und Umstellung bstande, druf het er am Inschtitut fir Obstböu un Gmiesböu an dr Hochschuel gschafft. 1960 isch er dert mit dr Arbet Zur Selektion und Körung beim Obst zum Doktor vu dr Landwirtschaft bromewiert wore.

Uf Vorschlag vum Bresidänt Otto Haag isch dr Götz ab em 1. Juli 1958 bis 1970 ehrenamtlige Gschäftsfierer vum Räbböuverband Wirttebärg gsii, d Gschäftsstell isch in syre Amtszyt z Stuegert-Birkach gsii. Näbe Verbesserige in dr Verbandsstruktur het er in däre Zyt Räbflurberainigunge un Kelterneiböute beglaitet, het bi dr Organisazion vu r Dytsche Räbböukungräss z Stuegert un z Offeburg mitgmacht un het e Hufe Fachpublikazione vereffetligt un Vordreg ghalte.

Anne 1970 isch dr Götz as Noofolger vum Ernst Klenk zum Diräkter vu dr eltschte Räbböuschuel vu Dytschland bstellt wore, dr Staatlige Lehr- un Versuechsaaschtalt fir Räbn- un Obstböu z Weischberg. Är het des Amt am 1. Merz 1970 aadrätte un het s bis zum 1. Mai 1995 25 Johr lang ghaa. In däre Zyt het d Räbböuschuel e Hufe neii Ufgabe iberchuu wie di amtli Qualitetswyybriefig, d Koordinierig vum Obst-Versuechsaabäu un s Erstelle un Fiere vu dr Räbböukartei z Wirttebärg. Dr Götz het e ganzi Generazion vu junge Räbbuure bregt, het d Neizichtig vu Räbsorte firschi dribe un isch unter dr Pionier vum Barrique-Uusböu z Wirttebärg gsii. No sym uusschaide as Diräkter vu dr Räbböuschuel het dr Götz verschideni ehrenamtligi ufgabe ibernuu, dodrunter bis 2010 s Amt vun eme Briefigslaiter vu dr Landesbremierig fir Wyy un Säkt.

Familie

In syre Zyt z Hohhaim het dr Gerhard Götz s speteri Frau Ilse chännegleert. Us dr Eh sin drei Chinder firigange. Dr Götz het z Obersulm-Affaltrach gläbt.

Vereffetlichunge

Näbe Hyfe Artikel zue Wyy- un Obstböu het dr Götz au ne baar monografischi Wärch verfasst:

• Zur Selektion und Körung beim Obst. Hohenheim, Landwirtschaftliche Hochschule, Dissertation vom 25. Mai 1960, DNB 480967482
• Süß- und Sauerkirschen. Ulmer, Stuttgart 1970, ISBN 3-8001-5248-7
• Obstsorten-Atlas. Kernobst, Steinobst, Beerenobst, Schalenobst. Von Gerhard Götz und Robert Silbereisen. Ulmer, Stuttgart 1989, ISBN 3-8001-5527-3
• Obstsorten-Atlas. Kernobst, Steinobst, Beerenobst, Schalenobst. Von Robert Silbereisen, Gerhard Götz und Walter Hartmann. 2. Auflage. Ulmer, Stuttgart 1996, ISBN 3-8001-5537-0

Uuszaichnige

Anne 1977 het dr Götz di Guldeni Ehrenodle vum Räbböuverband Wirttebärg iberchuu, 1995 isch er zum Ehremitglid vum Verband ernännt wore. Im nämlige Johr het er di Guldeni Ehrechappe vu dr Stadt Weinsberg iberchuu.

Literatur

• Gerhard Götz: Zur Selektion und Körung beim Obst. Hohenheim, Landwirtschaftliche Hochschule, Dissertation vom 25. Mai 1960, DNB 480967482, S. 112 (Lebenslauf)
• 1825–2000. 175 Jahre Weinbauverband Württemberg e. V. Weinbauverband Württemberg, Weinsberg 1999, DNB 963883925, S. 79
• Gerhard Götz (Red.): Festschrift 1868–1993. 125 Jahre Staatliche Lehr- und Versuchsanstalt für Wein- und Obstbau Weinsberg. Staatl. Lehr- und Versuchsanstalt für Wein- und Obstbau, Weinsberg 1993, DNB 931838657

Weblink

• Kilian Krauth: Weinexperte und Menschenfreund Gerhard Götz wird 90, Heilbronner Stimme, 5. Juni 2021
• Weinexperte und Wengertervater Götz wird 75, Heilbronner Stimme, 3. Juni 2006

Fueßnote

Dä Artikel basiert uff ere fräie Übersetzig vu dere Version vum Artikel „Gerhard_Götz_(Weinbaufachmann)“ vu de dütsche Wikipedia. E Liste vu de Autore un Versione isch do z finde.