Flurin Camathias

Der Flurin Camathias, wo am 6. März 1871 z Laax uf d Wält cho isch und am 3. Februar 1946 au döört gstorben isch, isch e Bündner Dichter und Übersetzer gsi.

s Lääbe

Der Flurin Camathias isch der Soon vom Johann Christian Camathias und vo der Maria Anna geb. Arpagaus gsi. Er isch uf Disentis und uf Fryburg is Gimnasium gange und het de z Chur Theology studiert Er isch Pfaarer z Brigels z Andiast un z Siat gsi und Domherr z Chur.

Als Dichter vo der Surselva het der Camathias es paar Wäärch uf Romanisch gschribe. I sym Värsepos Ils Retoromans het er d Gschicht vom Bärgvolch verarbeitet. I syne Stück chöme Saage und Määrli us der Gägend vor. Ufs Joor 1924 isch sys Feschtspiil La Ligia grischa fürs Jubileeum 500 Joor vom Graue Bund entstande; zu däm Wäärch het der Duri Sialm d Musig gsetzt; s Stück isch z Truns zeigt worde.

Vom Camathias git’s vil wältlichi und geischtlichi Lieder. Em Camathias sind Gedicht us em südfranzösische Sproochpiet öppis wichtigs gsi; er het Stück us em Provänzalischen und em Kataloonische is Bünderromanischen übertreit. Und er het au Gedicht us andere Sprooche wie öppen em Dütschen übersetzt.

1971 het der Alfons Maissen für d Gmeind Laax em Camathias syni Wäärch hundert Joor nach em Dichter sym Geburstag nöi usegää.

Vil vo syne Gedicht het der Hans Erni vertoont. Uf eis vo sine Gedicht het der Komponischt Gion Balzer Casanova (*1938) s Lied La sera sper il lag – uf Dütsch: «Am Obe bim See» – gmacht, wo anne 2009 in ere Sändig vo der Radiotelevisiun Svizra Rumantscha zum beliebtischte Gsangstück vom Bünderromanische gwählt worden isch. Me seit däm Chorlied au öppe «d Hymne vo de Romaane», und s beliebte Stück chame i verschidene Versioone uf YouTube go lose. Wo am 17. Augschte 20019 d Lia Rumantscha z Zuoz iires Hundertjoorjubileeum gfyret het, isch bim Feschtkonzärt mit Offnigem Singe au s La sera sper il lag uf em Programm gsi.

Wäärch

• Ils Retoromans, 1900
• Walther de Belmont, 1904
• La Merlotscha, 1905, 1919
• Suns ed accords, 1906
• La flur de Ramousch, 1909
• Davart criticar litteratura, 1909
• Igl emprem sanctuari sul Rein
• Las Statutas novas, 1913
• Historias dil Munt Sogn Gieri, 1916
• Cecilia, 1917
• La Ligia grischa. Representaziun historica, 1924
• Ovras. Cudisch festiv dedicaus dalla vischnaunca de Lags a siu convischin Flurin Camathias 1871-1946 cun caschun de siu tschienavel onn de naschientscha, 1971.

Literatur

• Clà Riatsch: Flurin Camathias In: Historisches Lexikon vo dr Schwiiz.
• Gion Deplazes: Funtaunas, Istorgia da la litteratura rumantscha per scola e pievel, S. 162-165.
• Gion Deplazes: Flurin Camathias bim Theaterlexikon
• Gion Deplazes: Die Rätoromanen. Ihre Identität in der Literatur. Mustér 1991.