Dr Ferdinand II. vo Aragon

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Bild vom Ferdinand II. vo Aragón
Underschrift Yo el Rey und s Siigel vom Ferdinand em Katholische (1506)

Dr Ferdinand, bekannt as Ferdinand dr Katholisch (aragonesisch Ferrando II o Catolico, * 10. Merz 1452 z Sos; † 23. Januar 1516 z Madrigalejo), isch vo 1468 Köönig vo Sizilie gsi. Vo 1474 bis 1504 isch er, zämme mit sinere Frau Isabella, as Ferdinand V. Köönig vo Kastilie und León gsi. Vo 1479 aa het er as Ferdinand II. d Riich vo dr Chroone vo Aragón regiert. Ab 1505 isch er as Ferdinand III. Köönig vo Neapel gsi. Noch em Dood vo sim Schwiigersoon Philipp het er 1506 z Kastilie d Regäntschaft für si Dochder Johanna übernoo.

Si Regierigszit[ändere | Quälltäxt bearbeite]

Dr Ferdinand het zämme mit sinere Frau Isabella über dr grösst Däil vo dr Iberische Halbinsle gherrscht. Si Ee mit dr Köönigin vo Kastilie isch d Grundlaag für e modärn spanisch Staat.

In iiri Regierigszit fallt d Erooberig vom Emiraat vo Granaada im Joor 1492, dr letscht maurisch Staat uf dr iberische Halbinsle. Mit dere Erooberig isch d Reconquista ume gsi. Bald druf het er s Alhambra-Edikt uusegee, wo d Juude din ufgforderet worde si, innerhalb vo drei Möönet Spanie und alli spanische Bsitz z verloo oder aber zum Christedum z konwerdiere. D Inkwisizioon under iirem fanatische Füerer, em Groossinkwisitor Tomás de Torquemada, het d Marranos afo verfolge. D Juude si drangsaliert worde, bis schliesslig alli konwerdiert oder Spanie verloo häi. 1502 si die letschte Muslim us Granada verdriibe worde.

Im gliiche Joor het dr Christoph Kolumbus, wo im Ufdraag vo de Katholische Majestääte e Westrute uf Asie gsuecht het, Amerika entdeggt. S Gold, wo vo dört zrugg uf Spanie brocht worde isch, het zum Däil dr wirtschaftligi Verlust usgliche, wo Verdriibig vo de Juude verursacht het.

Dr Ferdinand und d Isabella häi im ganze Land d Santa Hermandad (die Häiligi Bruederschaft) iigfüert, e Bolizei- und Justizsüsteem, wo die lokaale hermandades abglööst het, wo bis denn üüblig gsi si, und d Rächt vo dr lokaale Aristokratii iigschränkt het.

Spanie isch under de Katholische Majestääte zur Groossmacht ufgstiige, au dank em diplomatische Gschick vom Ferdinand und und isch 1492 in Bsitz vo dr Groofschafte Roussillon und Cerdaña choo. 1495 het dr Köönig die groossi antifranzöösischi Liga bildet. Er het 1503 s ganze Köönigriich Neapel an sich grisse und 1512 Navarra.

Litratuur[ändere | Quälltäxt bearbeite]

  • John Edwards: The Spain of the Catholic Monarchs 1474–1520. Oxford 2000.
  • L.P. Harvey: Islamic Spain, 1250-1500. University of Chicago Press, Chicago, 1990. S. 283-300.
  • Horst Pietschmann: Ferdinand II. ‘der Katholische’. In: Lexikon des Mittelalters (LexMA). Band 4, Artemis & Winkler, Münche/Züri 1989, ISBN 3-7608-8904-2, Sp. 358–359.
  • Joseph Pérez: Ferdinand und Isabella. Spanien zur Zeit der Katholischen Könige. München 1989.
  • Raphael de Smedt (Hrsg.): Les chevaliers de l’ordre de la Toison d’or au XVe siècle. Notices bio-bibliographiques. (Kieler Werkstücke, D 3) 2. Uflaag, Verlag Peter Lang, Frankfurt 2000, ISBN 3-631-36017-7, S. 164–168, Nr. 71.

Weblingg[ändere | Quälltäxt bearbeite]

 Commons: Ferdinand II. vo Aragón – Sammlig vo Multimediadateie
Information icon.svg Dä Artikel basiert uff ere fräie Übersetzig vum Artikel „Ferdinand_II._(Aragón)“ vu de dütsche Wikipedia.

E Liste vu de Autore un Versione isch do z finde.