Tomás de Torquemada

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Groossinkwisitor Tomás de Torquemada

Dr Tomás de Torquemada (* 1420 z Valladolid; † 16. Septämber 1498 z Ávila) isch e spanische Dominikaner, Biichtvater vo dr Isabella vo Kastilie und dr erst Groossinkwisitor vo Spanie gsi.

Si Lääbe[ändere | Quälltäxt bearbeite]

Dr Tomás de Torquemada isch uf e Dominikanerkonwänt San Pablo in sinere Geburtsstadt Valladolid gange und isch spööter Prior vom Chloster vo Santa Cruz, Browinz Segovia worde. Er het groosse politische Iifluss as Berooter und Biichtvater vo dr Köönigin Isabella I. und em Köönig Ferdinand II. ghaa. 1478 isch er Inkwisitor für Kastilie worde und 1483 het s Köönigsbaar bim Bapst Sixtus IV. duuregsetzt, ass er zum erste Groossinkwisitor vom Köönigriich Aragón ernennt worde isch. Spööter isch er au für Kastilie verantwortlig gsi und vo 1484 aa schliesslig für ganz Spanie.

Er het z Spanie en äigene inkwisitorische Verwaltigsapparat ufbaut, dr Grundstäi für die Spanischi Inkwisizioon, wo denn bis ins 19. Joorhundert bestande het. S Ziil und d Opfer vo de inkwisitorische Verfolgige si usser Heretiker in erster Linie d Conversos und d Moriscos gsi, Jude beziejigswiis Maure, wo zum Christedum konwertiert häi.

Dr Tomás de Torquemada het u. a. s Chloster Santo Tomás z Ávila gründet, won er 1498 gstorbe isch. 1836 isch si Graab z Ávila ufbroche und sini Chnoche si verbrennt worde, so wien er s mit sine OPfer au gmacht het.

Dr Tomás isch dr Nöwöö vom Juan de Torquemada, wo äine vo de brominäntiste Verdräter vo de papalistische Posizioonen uf em Baasler Konzil gsi isch.

Litratuur[ändere | Quälltäxt bearbeite]

Sachbüecher
  • John Edwards: Torquemada and the inquisitors. Tempus Books, Stroud 2005, ISBN 0-7524-3532-9.
  • Béatrice Leroy: L'Espagne des Torquemada. Catholiques, Juifs et Convertits au XVe siècle. Maisonneuve & Larose Paris 1995, ISBN 2-7068-1178-1.
  • John Murdoch: Torquemada. Eine Untersuchung über Tod und religiösen Fanatismus. Selbstverlag, Wolfsburg 1991.
  • Thomas Hope: Torquemada: scourge of the Jews; a biography. George Allen & Unwin, London 1939.
  • Norbert M. Borengässer: Torquemada, Tomás de. In: Biographisch-Bibliographisches Kirchenlexikon (BBKL). Band 17, Herzberg 2000, ISBN 3-88309-080-8, Sp. 1380–1381.
Belletristik
  • Victor Hugo: Torquemada (L'œuvre complète; 34). Éditions Bonnot, Bariis 1979.
  • Siegfried Obermeier: Torquemada, der Großinquisitor. Roman. Rowohlt, Reinbek 1996, ISBN 3-499-13862-X.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]