Erste Germanische Legion

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Di Eerschti Germanischi Legioon isch e Kampfeinheit vo dr Röömischen Armee gsi. Bi de Röömer het iire Name Legio I Germanica gheisse. Es het se sid de 40er Joor vom eerschte vorchrischtliche Joorhundert und bis anne 70 noch Chrischtus ggää.

Dr Gaius Iulius Caesar het die Eerschti Legioon ufgstellt füre Bürgerchrieg gäge Pompeius. Si het schynts anne 48 bi der Schlacht z Dyrrhachium, em hütige Durrës z Albaanie, s eerschte Mol mitgchämpft. D Legioon het em Caesar bi der wytere Gschicht ghulfe, bis dä anne 44 vor Chrischtus ermordet worden isch. Im Joor 41 het der Oktavian wider Soldate für en Eerschti Legioon usghobe. Anne 36 het er si bim Kampf gäge Sextus Pompeius bruucht und anne 31 gwüss au wider bi dr grosse Seeschlacht bi Actium im Weschte vo Griecheland gäge Mark Anton. Em Oktavian syni Armee het gwunnen und so het syni Zyt als Chaiser Auguschtus agfange.

Füffzää Joor lang isch die Eerschti Legion uf dr Ibeerische Halbinsle i dr Provinz Hispania Tarraconensis gsi. Si het bim Chrieg gäge d Kantabrer im Norde vo dr Halbinsle mitgchämpft un drno d Kolony Colonia Iulia Gemellensis Acci, s hütige Guadix i dr spanische Region Granada, gründet.

Wo dr Drusus bim grosse Chrieg vo de Röömer i den Alpe d Gägend vo Oberitaalie bis zum Rhy gsicheret het, isch di Eerschti Legioon anne 16 vor Chrischtus zu iim gschickt woorde zum d Front gäge Germaanie z versteerche. Si het s Legionslager Mogontiacum, s hütige Mainz, bout.

Vo deeten uus het d Legioon mit de Germaane am Limes im Land vom Rhy bis zu dr Donau z tue gha. Anne 6 noch Chrischtus isch si bim Chrieg gäge d Markomanne under denen iirem Chönig Marbod drby gsi. Me weiss, ass dr Lucius Nonius Asprenas sid em Joor 7 dr Legioonskomandant gsi isch. Di Eerschti und di Füüfti Legioon sind die einzige gsi, wo bi dr Varusschlacht anne 9 nit vrnichet woorde sind, es isch ne gglunge zum Lager Vetera bim hütige Xante am Rhy zrugg z goo.

Me dänkt, vo 9 bis 16 noch Chrischtus sig d Legioon z Köln stazioniert gsi. Dr Chaiser Tiberius het ere wäge de Fäldzüüg gäge d Germaane jetz der Zuename Germanica ggää. D Soldate vo dr Eerschte Legioon sind wyters im Rhyland ygsetzt gsi, wie me weiss au bim Schiffposchte Alteburg. I de Joor 14 bis 16 isch wider e groosse Germaanechrieg vo de Röömer gsi, wo mit acht Legioone vom Rhy uus wyt gägen Oschte cho sind. Anne 21 isch s zum Chrieg mit gallischi Schtämm choo. Den alte Soldate, de Veteraane vo dr Eerschte Legioon, het me Land i dr Provinz Raetia i dr Umgäbig vom Bodesee un dr Donau gää zum woone.

Sid em Joor 35 het d Germanica s nöie Lager Castra Bonnensia bout, wo die hütigi Stadt Bonn drvo chunt.

In Chrieg zwüsche verschidene röömische Chaiser und Gägechaiser i de Joor 68 und 69 isch au di Eerschti Legioon vrwicklet gsi. D Legioone vom Gebiet Undergermanie sind uf Rom iirem Komandant Vitellius go hälfe Chaiser wärde; scho gly drufabe isch dää aber vom Vespasian vertribe worde. Anne 70 noch Chrischtus isch am Rhy e schwääre Kampf zwüsche de röömische Legioone un de Bataver gsi, wo di Eerschti Legioon de Rebelle ghulfe het. Noch dämm Chrieg isch d Legioon drum ufglöst worde, und iiri Soldate het me dr im Kampf staarch dezimierte Sibete Legioon zueteilt.

Literatur[ändere | Quälltäxt bearbeite]

  • Emil Ritterling: Legio (I). In: Paulys Realencyclopädie der classischen Altertumswissenschaft (RE). Band XII,2, Stuttgart 1925, Sp. 1376–1380.

Weblink[ändere | Quälltäxt bearbeite]