Emil Anner

dr Emil Anner

Dr Emil Anner, wo am 24. Februar 1870 z Baden im Kanton Aargau uf d Wält cho und am 6. Februar 1925 z Brugg gstoorben isch, isch e Grafiker, Mooler, Zeichner und Büünebildner gsi.

Er isch dr Soon vom Gottfried Anner, wo z Bade Stadtroot gsi isch und s Schloss Schartefels het lo boue. Dr Emil Anner isch z Baden id Schuel und drno a d Kunschtgwärbschuel Züri, d École des Beaux-Arts z Gämf und di Königlichi Akademy vo de Künscht z Münche.

Anne 1901 isch er Zäichnigsleerer a dr Bezirksschuel Brugg woorde. Und drzue het er au am Leererseminar z Küsnacht gschaffet.

Es git vo iim bsunders chlyformatigi Grafik für Zytschriften und Büecher. So het er Sache füren Aarauer Verlag Suurländer gmacht, zum Bischpiil d Zeichnige im Paul Haller sym Epos Juramareili.

Literatur

• Schweizerisches Künstler-Lexikon, Bd. 1 S. 40.

Weblink

 Commons: Emil Anner – Sammlig vo Multimediadateie

• Sikart