Elisabeth Thommen

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Elisabeth Thommen (* 10. April 1888 z Wolbrg; † 24. Juni 1960 z Züri) isch e Schwiizer Journalischtin, Schriftstellerin und Feminischtin gsi.

s Läbe[ändere | Quälltäxt bearbeite]

D Elisabeth Thommen isch d Dochter vom Hermann Thommen gsi, wo z Waldeburg im obere Baselbiet en Uurefabrigg gha het. Iri Muetter isch d Anna Thommen-Tanner gsi. Si het z Basel dr Pruef vo dr Chindergärtnerin gleert. Anne 1912 het si dr Jurischt Albert Wirth ghürootet; wo die Ee denn nach es par Joor usenand ggangen isch, het si als Journalischtin gschaffet. 1919 isch si d Redaktoorin vo dr Zytschrift Schweizer Frauenblatt worde. Wil si do derby dütlech antimilitaristischi und feministischi Ideeè verträtte het, isch si nach chuum drüü Joor entloo worde. 1921 het si s zwöite Moll ghürootet; ire zwöit Maa isch dr Jakob Bührer gsi.

1928 het d Thommen d Leitig vo dr Zytig vo dr Frauenusstellig SAFFA z Züri gha. Und i de 1930er Joor het si e Zyt lang s Joorbuech vo de Schwiizer Fraue useggä. Si het vil Joor für d Nazional-Zytig und für verschideni Frauezytschrifte gschribe. Sid anne 1933 het si bim Radio Beromöischter gschaffet, wo si 1938 e volli Stell als Redaktorin übercho het. Si het bis 1953 d Sändig für d Fraue gleitet.

D Thommen het sech konsekwänt für d Frauebewegig ygsetzt und isch immer wider mit scharfe Tegscht für d Rächt vo de Fraue ufgfalle.

Wärch[ändere | Quälltäxt bearbeite]

D Elisabeth Thommen het es par literarischi Wärch gschribe, e Teil dervo i dr Baselbieter Mundart.

  • Das Tannenbäumchen, drei Frauenbilder, Erzählungen, 1919
  • Evas Weg, 1925
  • zäme mit dr Margaretha Schwab-Plüss und em Traugott Meyer: Baselbieter-Lüt, 1925
  • Es Buscheli grynt, Mundartgedichte. 1937.
  • D’Uffertwegge

1938 het dr Adolf Guggebüel zwöi vo irne Gedicht im Samelband mit schwyzerdütscher Lyrik Schwyzer Meie abtrukt: s einte het “Bim Zibelesetze” gheisse und s andere “Es git kei Wäg”. Beid sind us em Gedichtband Es Buscheli grynt, wo dozmol ganz nöi usecho isch.

Literatur[ändere | Quälltäxt bearbeite]

  • Regula Ludi: Thommen, Elisabeth. In: Historisches Lexikon vo dr Schwiiz.
  • Huldi Max, Kaufmann Ueli: Mir wei luege. Texte in Baselbieter Mundart. Liestal 1982, S. 333.
  • Anita Richner, Nicole Schaad: Die Zähmung einer Widerspenstigen. In: Sébastien Guex (u. a.): Krise und Stabilisierung: Die Schweiz in der Zwischenkriegszeit. 1998, S. 211–223.
  • Thomas Schweizer: Die Tochter des Uhrenmachers. 2007.
  • A. Thommen: Elisabeth Thommen. 1960.
  • Betty Wehrli-Knobel: Eine der mütterlichsten Frauen. Elisabeth Thommen, Journalistin, Radiomitarbeiterin und Schriftstellerin. In: Baselbieter Heimatbuch, 9, 1962, S. 114–120.