Dominic Oppliger

Dr Dominic Oppliger isch anne 1983 z Schlieren uf d Wält cho, und r isch e Schwiizer Musiker und Mundartschriftsteller.

Hüt läpt dr Oppliger z Züri. R het i verschidene Prüef, öppen im Gaschtgwärb, im soziale Beraich und als Gärtner gschaffet. Vo 2014 bis 2017 het r a dr Zürcher Hochschuel für Künscht s Fach Transdisziplinarität gstudiert.

Sid anne 2005 het r i verschidene Gruppe Musig gmacht und Song zerscht uf Änglisch und sid öppe 2010 i dr Mundart gschribe, gsungen und useggä. Zäme mit anderne Musiker tritt r i dr Gruppe Doomenfels uuf, wo Mundartrock spiilt; Doomenfels isch dr Künschtlername vom Oppliger (gsi). Für s ensemble tzara, wo zytgössischi Musig macht, het r es Wärch komponiert.

Im 2018ni het r sini Mundartgschicht acht schtumpfo züri empfernt bim Verlag Der gesunde Menschenversand useprocht. Die fantasyvolli Gschicht spiilt im hüttige Läbe vo Züri. Mit sinere ungwoonte Schrybwys, wo frei em foneetische Usdruck vom farbige Zürcher Tieläkt noogoot, bringt eim dä Tegscht es nöis Lääserläpnis vo dr Mundart. Öppis wo dr Oppliger au no gschribe het, isch s glorihoul / da cha nöpfil schiäf ga. Dr Autoor list a vilnen Oort i dr gschnällen Art vo Spoken Word-Performances us dr Novälle acht schtumpfo züri empfernt und sine anderne Wärch.

Im Sumer 2018 bringt d SRF-Mundartsändig Schnabelweid es Porträät vom Autoor, und drzue tuet dr Aargauer Schauspiiler Aaron Hitz em Oppliger sin Tegscht acht schtumpfo züri empfernt vorlääse. Dr Schnabelweid-Redakter Markus Gasser het mit em Schriftsteller über däm sis Läbe, sis Wärch und bsunders au über die eigeti Verschriftig vo dr Mundart und über die modärni Entwiklig vo dr urbane Umgangssprooch in ere Grosstadt wie Züri gredt.

Weblink

• d Website vom Oppliger
• «acht schtumpfo züri empfernt» uf menschenversand.ch
• dr Dominic Oppliger uf dr Website vo dr Zürcher Hochschule für Künscht (zhdk.ch)