Cornelia Schefold-Albrecht

D Cornelia Schefold-Albrecht, wo am 4. Mai 1941 uf d Wält cho isch, isch e Füsiotherapöitin und e Hebeldanktreegerin vo Basel.

s Läbe

Si isch z Basel ufgwachse und het dört ihre Bruef gleert. Si het als Füsiotherapeutin gschaffet und au Geburtshilf gleischtet. Si isch mit em Basler Mathematiker und Wirtschaftswüsseschaftler Bertram Schefold, wo am 28. Dezämber 1943 uf d Wält cho und a der Uni z Frankfurt Profässer gsi isch, ghüroote gsi. Anne 2017 het si für di Grüenliberali Partei bi de Basler Bürgergmeindwahle kandidiert. Si isch Mitglied vom Verein «Freunde der Basler Münsterbauhütte» und vo anderen Organisazioone.

d Schefold und der Hebel

Wo d Cornelia Albrecht vierzääni gsi isch, het ihre Vater s Huus am Dootedanz 2 z Basel gchauft, und dört wohnt si sider. I däm Huus isch dr alemannisch Dichter Johann Peter Hebel anne 1760 uf d Wält cho, und anne 1812 isch är zum letschte Mol i däm Huus gsi. Das alles het dr Cornelia Schefold-Albrecht grossen Ydruck gmacht, und si het sech gnau dr Gschicht vom Huus und vom Hebel gwidmet.

Im Joor 2014 het se dr Hebelbund vo Löörech drumm zu sim Früeligsfescht, em «Hebelsuntig», yglade und ere der «Hebeldangg» gää; das isch d Uuszeichnig vo däm Verein für Lüüt, wo öpis guets für d Kulturgschicht vom grosse Dichter Johann Peter Hebel too hän. Der Vizepresidänt vom Hebelbund, dr Schopfemer Schuelleiter Volker Habermaier, het doo für d Schefold-Albrecht e Laudatio ghalte, won er gseit het, wie schön ass es sig, dass sii so guet zum Hebel sim alte Huus luegi und de Bsuecher em Dichter sis Zimmer zeigi und au öppe Gedicht vonnem zum Fäischter uus de Lüüt vorträgi, wo sech füre Hebel inträssiere. Si ghöri zu dene Lüüt z Basel, wo bsunders guet s Adänke an Johann Peter Hebel pflääge.

Und dr Habermaier het au dra erinneret, wie’s d Cornelia Schefold gsi sig, wo anne 1995 bim Basler Komponischt Bernhard Batschelet e Komposizioon bstellt heig, wo „Hommage à J. P. Hebel. Eine akustische Betrachtung“ heisst. Für d Uruuffüerig heig si d Hebelforscher Jan Knopf und Rolf Max Kully yglade. Und im 2001 heig si es „Fescht für Hebelforscher und Dichter“ organisiert.

Und do het di nöibachni Hebeldanggtreegerin de Lüüt z Löörech grad chly us ihrem Lääbe und vo dr Gschicht vom Hebelhuus, wo ursprünglig vom Middelalter här chunt, verzellt: «Liebi Mitgliider vom Hebelbùnd, liebi Hebelfrind und -frindyyne. Es isch fir mii e grossi Fraid, dass y dr „Hebeldangg Lörrach“ bikumm, well y gschpyyr, dass doo dermit myni verschiidene Tätikaite, mit dääne y s Hebelhuus im Sinn vom J. P. Hebel bèlääb, vo Eich hònòriert wäärde. Daasch èbbis ganz Bsùnders fir mii und doo derfiir dangg y em Hebelbùnd Lörrach ganz häärzlig.»

Vom Johann Peter Hebel sinere erschte Chammere het si gseit: «Sy Geburtsstùùbe: Es isch e Kammere mit Danneboode, dervòr isch e Laube. Dert isch Liecht und Luft, dr Ryy ruscht, s Wasser fliesst verby, derhinter sin wyti Hiigel und Wälder, dr Himmel isch häll. Uff dr andere Syte aber, isch e gäächi Stääge, e ängi Gass, e dùschteri Muure mit de Helge vom Dootedanz.»

Und d Schefold verzelt, wie si vil a die Oort goot, wo me öpis für s Adänke an Johann Peter Hebel macht: «Y bsuech au gäärn Hebelveraaschtaltige: Vorträäg, Lääsige, Uusstellige, Symposie, Konzäärt, Wanderige, Workshops etc. Als Byschpyyl nimm y s Jòòr 2010, s 250. Jubiläumsjòòr vom J. P. Hebel. Do bin y gsi an 24 Veraaschtaltige in Basel und an 26 Veraaschtaltige in Ditschland: vo Karlsrue bis no Duttlige. Daas alles beryycheret mi. Y frai mi, wenn e baar Mèntsche mee sich in e Hebelgschicht vertiefe. Dass dr Hebelbund Lörrach mir doo derzue die Anerkènnig git, doo dèrfir dangg y vyylmool. […] Y glaub, dr Hebel hätt e Fraid, wenn äär wisst, dass y dää Hebeldangg 2014 mit syner Muetter dail.»

D Cornelia Schefold-Albrecht brichtet au süscht öpe vo däm, wo si übere Johann Peter Hebel weiss. So het si anne 2015 z Wyl am Rhy bi der Markgräfler Trachtegruppe e Vortrag übere berüemt Dichter ghalte.