Christophe Darbellay

Us der alemannische Wikipedia, der freie Dialäkt-Enzyklopedy
Dialäkt: Wallisertitsch
Der Christophe Darbellay (2011)

Der Christophe Darbellay, wa am 7. März 1971 z Martinach isch uf d Wäält cho, isch en Schwizer Politiker (D Mitti, vorer CVP). Sit 2017 isch er Staatsrat vam Kanton Wallis. Va 2003 bis 2015 ischer im Nationalrat gsi. Va 2006 bis 2016 ischer der Presidänt vaner CVP Schwiz gsi.

Läbu[ändere | Quälltäxt bearbeite]

Der Darbellay isch z Martinach üfgwagsu.[1] Är het aner ETH Zürich Agraarwisschuschafte studiert und het naacher z Bääru und z Lausanne iner Privaatwirtschaft gschaffut. Dernaa ischer driiuhalb Jaar z Bääru Vize-Diräkter vam Bundesamt fer Landwirtschaft gsi.

Der Christophe Darbellay het schiini politisch Löifbaan iner Unnerwalliser Sektoo vaner Chrischtlichsoziaalu Partii (CSP) agfangu. Är het schi meermals ufera Lischta va inu la üfstellu. Binu Schwizer Parlamäntswaale 1999 het er fer di Chrischtlichsoziaal Partii Unnerwallis als Ständerat kandidiert. Är isch zwaar nit gwäälte cho, aber het zimli e Schuppu Stimme bercho. Churzi Zit spääter het er de zer CVP gwägslut, wa zimli greesser isch gsi, wa di CSP.[2][3] Binu Waale 2003 isch er de inu Nationalrat gwäälte cho – är isch daazumal ds jungschtusch Mitglid va schiiner Frakzioo gsi. Va 2004 bis 2008 isch er Gschäftsfierer vaner Gsellschaft vanu Schwizer Tierärztinne und Tierärzt gsi. Wa de di Doris Leuthard, wa dennzumal Partiipresidänti isch gsi, inu Bundesrat isch gwäälti cho, het nu schiini Partii am 2. September 2006 z irusch Naachfolger gmacht. Bis 2016 het er di CVP als Presidänt gleitut. Waaner de isch zrugggiträtu het der Gerhard Pfister das Amt va imu ubernu. Va 2012 bis 2017 isch der Darbellay Presidänt vam Schweizer Casino Verband gsi.[4]

Im März 2017 isch der Darbellay mit 54'338 Stimme in d Walliser Regierig gwäälte cho,[5] im März 2021 isch de numal fer en witeri Legislaturperiooda gwäälte cho. Är isch Scheff vam Departemänt fer Volkswirtschaft und Bildig.[6] Vam 1. Mai 2023 bis zum 30. April 2024 isch er Regierigspresidänt,[7] das isch er vorer scho mal vam 1. Mai 2020 bis zum 30. April 2021 gsi.[8]

Politischi Positioone[ändere | Quälltäxt bearbeite]

Lüt Smartvote isch der Darbellay en gmäässigte, zrugghaaltund konservatiive Politiker. We mu schiis Abstimmigsverhaaltu wäärund der 48. Legislatuur alüegt und mit schiinu Partiikolleeginne und -kolleegu vergliicht, ischer schüst iner Mitti vaner Partii glägu.

Spääter het schi der Darbellay immer mee öi fer grieni Aliggu angaschiert. Är het zum Bispil gfordrut, dass mu di Tribhüsgas-Emissioone tüet reduzieru und in d ernöierbaaru Energiie tüet inweschtieru.[9] Iner Wirtschaftspolitik het er schi vam Neoliberalismus dischtanziert und het staatlichi Igriffa in d Wirtschaft verteidigt.[10]

Privaats[ändere | Quälltäxt bearbeite]

Der Darbellay isch verheiraatute und het vier Chind. Schini Fröi isch d Florence Carron Darbellay. Schi isch di Gmeipresidänti va Martigny-Combe.[11]

Weblink[ändere | Quälltäxt bearbeite]

Füessnoote[ändere | Quälltäxt bearbeite]

  1. ↑ Interview: Ohne die CVP wären wir immer noch in der Atom-Ära. In: Der Bund. 11. Juni 2011.
  2. ↑ Einerkandidatur für das CVP-Präsidium, Swissinfo, z letscht aglüegt am 1. Februar 2024.
  3. ↑ Der Spieler In: Neue Zürcher Zeitung. z letscht aglüegt am 1. Februar 2024.
  4. ↑ Vonlanthen tritt Nachfolge von Darbellay an. In: 1815.ch vom 17. Mai 2017.
  5. ↑ Darbellay nach Freysinger-Abwahl: «Als Mensch tut er mir leid». In: 1815.ch, 19. März 2017.
  6. ↑ Christophe Darbellay auf der Website des Kantons Wallis, z letscht aglüegt am 1. Februar 2024.
  7. ↑ Präsidium des Staatsrates - Christophe Darbellay tritt am 1. Mai die Nachfolge von Roberto Schmidt an. In: VS.ch, 28. April 2023.
  8. ↑ Präsidium des Staatsrates - Christophe Darbellay folgt auf Roberto Schmidt. In: VS.ch, 1. Mai 2020.
  9. ↑ siehe Berichterstattung in 20 Minuten online vom 31. März 2009
  10. ↑ siehe Berichterstattung von Radio DRS über den Parteitag der CVP vom 14. Februar 2009 (Archiv)
  11. ↑ Darbellay und Couchepin werden Präsidentinnen. In: Blick. 13. November 2016.
Dä Artikel basiert uff ere fräie Übersetzig vu dere Version vum Artikel „Christophe_Darbellay“ vu de tüütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Christophe_Darbellay&oldid=1048329"